باهي توا انجمو نحكيو في الوضوح؟... وفي الصندي على شمعناه حوار؟... وشنية مكوناتو؟ ...ولاّ نواصلو في دزان النح؟... والكلام كي الظلام؟... و الشعارات الهلامية؟ كيف كلام سيدنا الملهم العظيم؟ ونواصلو في التزلويص؟
بربي زعمة موش وقيت نعملو فريش... ونبطلو من التزوليص... ونغزرلو قبل كل شيئ لهاك الشعب المغبون اليوم... بعد ما ثار من أجل الحرية والكرامة الإنسانية وحياة كريمة ؟
عاد بعد فشل الحشد الشعبي الشعبوي الفاسد .. في تجنيد الشعب الذي يريد..وتركيز حملتو ضد الأحزاب إلي يندعي انها لكلها عنوان الفساد وكذا.... تحضيرا للبني القاعدي إلي يجيبها تلعب في كتب الجغرافيا .
وبما اني من بين الي يعتقدو انو ما ثماش ديمقراطية بدون أحزاب.... و الحزب وقت يفسد القضاء المستقل وحدو يتكفل بيه.... وموش خصومه السياسيين... خاطر وقتها ينجمو يكونو أفسد منو... خصوصا كيف يكونو شعبويين وهدفهم تركيز نظام استبدادي شمولي.. والأنظمة هاذي بالضرورة تكون من أفسد الأنظمة لأنها بدون رقيب ولا حسيب ولا شفافية ولا هم يحزنون.. على خلاف الأنظمة الديمقراطية..
وبعد أن توضح منذ الإنقلاب للبعض... وبعده للبعض الآخر...ان المنقلب شاڨڨ الخلاء... وهازز البلاد للفينڨة... والجوع... و مشكلتو الوحيدة فرض دستور حكم فردي مطلق شمولي من فوق وعلى الجميع....ومضمونه رجعي مجتمعيا ...وخطير اجتماعيا... وعلى هذاكا رافض الحوار موش ما تنكشف رواندوا للعلن... في نقاش مجتمعي شفاف في كل جوانبه ... ويحب يفرضو قطعة لف وعلى وجه السرعة على الجميع... بواسطة استفتاء يزور الإرادة الشعبية ويدوس على السيادة...
وبعد ما إلي هذا أصبح يحكي على حوار هولامي....بدون توضيح مكوناته…
وبعد ما كثر الترهدين في الميضوع ... ولي هذا يتهرب من توضيح مكونات هذا الحوار…
وبعد ما تعددت الأطراف الي تحكي بأنها مع الحوار....لكن بشرط عدم مشاركة المتسببين في الأزمة... تضحكني ياسر العبارة هاذي…
عاد وخيكم يحب يذكرهم.... بالكشي الذكرى تنفعهم…
شكون مسؤول على الأزمة؟
وساعة قبل.... في شنوا تتمثل الأزمة؟
الأزمة يا أكارم بالنسبة للمواطن.... يعني الشعب صاحب السيادة... والأساس بالنسبة للغالبية العظمى لشعب...متمثلة في تدهور ظروفه المعيشية... وانسداد الآفاق الإجتماعية لأبناءه... وتفشي البطالة والعمل الهش....وتدهور التعليم والصحة والمرافق الإجتماعية.... وتلوث البيئة... وتعمق الفوارق الإجتماعية.. والإعتداء على الحقوق والحريات...الخ..
وشكون مسؤول عليها الأزمة هاذي؟
طبعا الحكومات المتعاقبة منذ الثورة...والحكومة الي باش تتنصل من مسؤولياتها.... تتفضل تنورنا شنية انجازاتها.... خلينا نضحكو شوية في ها الجو القاتم.
و الحكومات هاذي موش تكونت من الأحزاب؟ وشكون اختار رؤساء الحكوامات هاذم؟ وشكون عطاهم ثيقتو في المجلس؟ موش رئيس الدولة هو إلي اختار... والأحزاب هي إلي عطات الثقة؟ ولاّ الي هذا دورها فر فر من المسؤولية؟ سجاعة سياسية كبيرة هاذي.
بربي موش سؤال كبير هذا؟ .... خاطر الدستور خص رئيس الحكومة بالصلاحيات الحصرية في كل ما يتعلق بالأزمة إلي ذكرناها... ورئيس الدولة في اختيار رئيس الحكومة... ولاّ زعمة آنا غالط؟
إيه وتوا وشنوا سببها الأزمة... طبعا هناك الفساد....لكن موش كان الفساد... موش زادة ثمة غياب برامج تنمية مستدامة.... ووعود انتخابية زائفة كرهت الشعب في الانتخابات.... ورفض تفعيل وتطبيق الدستور في الآجال الي نص عليها من طرف أحزاب تعتبر انو ما تليقش بيها شفافية مؤسسات النظام البرلماني لأنها تربات على الحكم الفردي المركزي وتعيبن الأنصار في مفاصل الدولة وموش تعيين على أساس الكفاءة .... وترفض بالتالي اللامركزية الديمقراطية فعرقلت بعث المجالس الجهوية المختصة في التنمية الجهوية... ولي تخلي المواطنين في جهاتهم بنتخبو ممثليهم باش ينميو جهاتهم... وخلات صلاحياتها عند الولاة الي هي تعينهم خلافا للدستور....وتعمل فيها انها هي الي عملتها التنمية كان صارت طبعا... الخ
عاد الأحزاب إلي حكمت منذ انتخاب المجلس التأسيسي...شكونها زعمة؟
هاني باش نذكرها حسب الترتيب الزمني في الحكم.... موش ما يتغشش حد .... وبربي كان نسيت البعض... ذكروني يذكركم ربي في الشهادة... خاطر ألزمهاير خدام برشة منذ الإنقلاب .
وهوما: أيا شدو رواحكم…
*النهضة... طبعا طبعا.... ولكن أيضا المؤتمر والتكتل.. مدة سنتين...
*حركة الشعب... إيه نعم يا أكارم.... بوزير تربية في حكومة علي العريض... دزها علينا واندعى وقتها انو مستقل.... وبعد نلقاووه مترشح رئيس قايمة لحركة الشعب....نهبلوكم احنا التوانسة تزلويص .
*المهدي جمعة...مدة عام.... موش عمل حزب من بعد... وترشح بيه؟ والله ضايع عليا توا اسمو. برشة ضاربهم ألزمهاير في الميضوع هذا
*النداء... طبعا طبعا... وهاذي زادة برشة يتناساوها.. لغرض في نفس يعقوب...خصوصا هاك إلي عملو الحملة للسبسي المتوافق مع الشيخ في الرئاسية... وعاملين فيها تقدمين ضد النهضة.... واليوم يعملو في الفارينة للمنقلب.... وضد مجرد حوار مع النهضة....وقت كانو يساندو في حكمة النداء والنهضة جملة... يا بوڨلب... ياسر يضحكني التزلويص هذا.... في بالهم الناس لكل ضاربها الزمهاير .
والحكومة هاذي موش دامت سنتين برئاسة الحبيب الصيد الذي لم يسهر علي تطبيق الدستور وتفعيله... وقت كانت هاذيكا من مسؤولياتو الأولى كيف ما يقول الدستور خاطر مشاريع الحكومة عندها الاولوية على مشاريع الكتل النيابية ؟
عاد هذا السيد... المسؤول الأول على تطبيق وتفعيل الدستور بعد سنّه... عمل فبها موش هنا... تطبيقا لموقف عرفو السبسي الي قال مرارا ان الدستور موش هو إلي عملو... في عوض يخدم احتراما للشرعية لتطبيقه ... علاوة على انو السيد مفرمت في سكولة بن علي ومخو ما يتأقلمش مع دستور ديمقراطي.. وطبعا إضافة لذلك كانت سياستو الاقتصاديه والإجتماعية حموم.. كيف إلي قبلو ولي بعدو.
وكان تتذكرو حكم مع الوطني الحر..... وآفاق ... إضافة لوزير من النهضة في إطار التوافق المشهور بين الشيخين..
ولكلهم... كيف إلي قبلهم... ولي بعدهم... مسؤولين.
* فلول النداء المختلفة بمساندة النهضة.... مدة ثلاثة سنوات برئيس حكومة... الشاب سي الشاهد إلي عينو السبسي...بعد ما جاب على برة الصيد... إلي حب يكون عندو رأي مستقل في بعض المواضيع... ياخي سي الشباب فصعلو بالحكومة جملة...وكون حزبو…
عاد وزرة الحكومة هاذي..... المشاركين في المسؤولية عن الأزمة.... وخدمو اليد في اليد مع النهضة... واليوم يدزو في كامل المسؤولية عليها بعضهم شافو أرواحهم سيديجا فيسع رؤساء تونس في مكان السبسي... ياخي إلي هذا عمل حزبو.... باش يتقدم بيه للانتخابات المقبلة.
وعلى سبيل الذكر لا الحصر.... الرفيق عبيد البريكي... والرفيق ناجي جلول... والإثنين اليوم كرؤساء أحزاب يعملو في الفارينة للإنقلاب.... وضد الحوار مع النهضة وقت كانو يحكمو معاها...و مسؤولين معاها على الأزمة ... ملاّ جو وقت نسمعهم يحكيو... ألزمهاير خدام.
*حكومة الفخفاخ.... إلي اختارو المنقلب على الدستور دون سواه.... وكل واحد مسؤول على اختياراتو... ولاّ لا؟عاد الحكومة هاذي موش كانت فيها النهضة إضافة لحركة الشعب والتيار وأطراف من فلول النداء؟ وحكمو مع بعضهم؟
*حكومة المشيشي... إلي جابو المنقلب من عندو في القصر.... وفرضو رئيس حكومة على الأحزاب تحت تهديد حل المجلس..... واختارلو جزء من وزراءو في حكومتو من جماعة الحملة التفسيرية.... وبالطبع بتوافق مع النهضة... بدليل أنها صوتت عليهم في المجلس....
ريتوهم إلي ذكرتهم هاكم لكل؟
لكلهم مسؤولين متضامنين على الأزمة.... ولو بدرجات مختلفة... حسب مدة الحكم.... وحسب مدى تأثيرهم الفعلي في الحكومات المتعاقبة.... وكل واحد كيفاش يقيمها وهو حر...لكن لكلهم عندهم درجة من المسؤولية.. لكن منذ الإنقلاب.. إلي هذا ضربو ألزمهاير... ربي يعفينا ويعفيكم منو...و انشالله المساكين الي ضربهم ربي يشفيهم منو.
عاد الشيئ إلي يضحك... انو الجماعة حكمو مع بعضهم.... وما كانتش عندهم مشكلة انهم يحكمو مع بعضهم....حتى هي فيها كراسي الحكاية .
لكن بعضهم اليوم يتنصل بكل وقاحة من مسؤوليته في الحكم... بعد الإنقلاب وفي إطار الفارينة للمنقلب... ثماش ما يشركهم معاه في الحكم.... لكن يبطى برشة . عاد هاذم لكلهم.... إلي يعتبر نفسو منهم ماعندوش جزء من المسؤولية في الأزمة الي أدت للوضع الراهن... يتفضل ينورنا عن إنجازاتو في الحكم وهانا بكلنا آذان صاغية.
وطبعا بدون ما ننساو الأخت عبير... إلي مدة عامين وهي تعرقل في عمل مجلس في إطار خلافها مع الشيخ.....وساهمت من موقع متقدم في تشليكه.... بالكشي زادة هكاكا يكون العمل التشريعي؟
عاد الجماعة هاذم.... بعد ما حكمو مع بعضهم...بعضهم يرفض مجرد الحوار مع إلي حكم معاه... لإنقاذ البلاد سبحانها الفارينة للمنقلب قداش تبدل الاحوال. ولكن الشيئ إلي يضحك برشة برشة... انهم عاملين فيها يقصيو في لخرين حبا في المنقلب... وهوما المنقلب مقصيهم.
وأكثر من ذلك....بما انهم مشاركين في الحكومات المتتالية وعندهم مسؤولية في "عشرية الخراب" كيف هوما يقولو...الجماعة أقصاو أنفسهم بيدهم.
عاد توا ملخر شوية بديهيات...
الحوار يلي عاملين فيها َمهفاة….ولي هبلتو الشعب بالكلام الهلامي… هو معروف شمعناه في كل بلدان العالم… هو لا يقصى منه أحدا…ويصير أساسا ببن أطراف الأزمة السياسية….مالا تحبو تخلقو العجلة من جديد بحوار بين جماعة تغني وجناحهم يصفق عليهم؟ وطبعا زادة الحوار معروف… لا يقصى منه إلا من أقصى نفسه بنفسه .. وزعمة شكونو لول إلي مقصي نفسه اليوم من الحوار كان تعمل؟
موش هاك إلي يندعي أنو ما يتحاورش مع الفاسدين؟ ومتخبي وراها العبارة الهلامية هاذي لإقصاء جميع الأحزاب بوه على خوه… لأنها عندو فاتها الزمن.. وما عندهاش بقعة في بنيو القاعدي الهلامي ؟
وتوا بالرسمي…وهذا الخطير….. وقت تقرأ يا بوڨلب… يا بوڨلب..من بعض مكونات المجتمع المدني نفس النمنامة الإقصائية متاع ما ثماش حوار مع المتسببين في الأزمة وكذا…وقت هوما مبدئيا ونظريا.. . مستقلين على مختلف الأطراف السياسية… وعلى نفس المسافة من الجميع بحكم استقلاليتهم… تفول فاش يعملو هاذم وفاش يخضرطو؟… ولصالح شكون؟
ونولي نتساءل جديا… وين توفى الاستقلالية ووين يبدى توظيف المنظمات المستقلة؟
فبحيث…الإخشيدي طلع موش وحدو يحكي بالكلام الهولامي وقت يقول نرفض الحوار مع الفاسدين والخونة والميكروبات الخ من العبارات السامية…. بدون تحديد شكونهم. برشة دوروها هلاميات كيفو… يفسكيو عليه. يحكيو بطريقة اخشيدية هولامية على المتسببين في الأزمة.. بدون ذكر شكون…
ولوكان تحل الصرة تو تلقى إلي هذا طبعا موش يقصد في روحو… لكن يقصد أطراف مختلفين…
وبحيث…زعمة يلزم زادة نذكر بشكونهم مكونات الحوار متاع 2014؟ بالكشي الزمهايرَ خدام؟ خاطر ثمة شكون اليوم يظهر فيه اتطور… قام وصبح رافض مبدئيا للحوار….إيه مبدئيا يا بوڨلب. وهذا بعد ما شارك فيه قبل… والمكونات ال 22 معروفة… سبحانه مغير الأحوال.
وموش ما نزيدش نطولها عليكم… هوكة تنجمو تعملو نقرات عند الشيخ ڨوڨل… تو يقوللكم شكونهم.
وتوا بالفلاقي
كذاب.. إلي يقول النهضة مسؤولة وحدها علي سماوها "عشرية الخراب"…ومتهرب من مسؤوليتو معاها… كذاب… إلي شارك في الحكم في العشرية السابقة… و داززها انو ما شاركش فيها…. وموش مسؤول…. هذا كي تجي تشوف هو موش مسؤول توكور.
ومسعترف انو مخرب…. إلي مسميها عشرية الخراب…وهو شارك في الحكم فيها . وبحيث…مسكينة تونس … وربي يهدي وبرة.