فارينة مسوسة

عاد خونا قيسون مازال شاڨڨ الخلا...وحدو.. السيد شادد صحيح يحب يعمل دستورو وحدو...ويصوتلو عليه الشعب نهار 25 جويلية المقبل... في الذكرى الأولى للإنقلاب.

وقال باش ياخذ مقترحات الشعب الذي يريد... عن طريق منصات إلكترونية.. إلي بش يعملها ويخلصها من رزق البيليك... وهذا راهو ينطبق عليه الفصل 96 المشهور...خاطرو استغلال لموارد الدولة لمنفعة سياسية شخصية..

وهاذي تشبه لحكاية تمويل الأحزاب بالفساد من أموال البيليك.. ورجعنا بيها لسلوك حزب الدولة ودولة الحزب الواحد إلي يمص في رزق الدولة..

وزيد السيد موش عارف... ولاّ يتجاهل... والله أعلم.. انو ثلثين فقط من الشعب التونسي مبرنشي على الأنترنات.. آما الثلث الباقي... بش يكون مقصي بالضرورة من "الاستشارة" الفولكلورية هاذي…

موش باهية الحڨرة يا قيسون...راهم جزء كبير من الشعب الذي يريد أقصاهم كيف الأحزاب والمجتمع المدني والنقابي.

آما آنا راني شايخ توا على أحزاب الفارينة للإنقلاب...إلي مازالو يندعيو انو القيسون عمل إجراءات تصحيحية ضد النهضة.. وموش انقلاب ضد الدستور والدولة... ياخي حطهم في نفس الشكارة مع النهضة واقصاهم من تحديد مستقبل البلاد مع بقية الأحزاب والمجتمع المدني والنقابي...وثمة حتى شكون شتمو. فبحيث...حتى الفارينة طلعها القيسون مسوسة.

Poster commentaire - أضف تعليقا

أي تعليق مسيء خارجا عن حدود الأخلاق ولا علاقة له بالمقال سيتم حذفه
Tout commentaire injurieux et sans rapport avec l'article sera supprimé.

Commentaires - تعليقات
Pas de commentaires - لا توجد تعليقات