ياسر ضحكوني الي جدت عليهم بطاقة الجلب ضد المرزوقي. هي تهمة سياسية... متاع تصفية حسابات سياسية... ومتاع توظيف قضاء.. خاطر إلي أصدرها... ولي طلبو فيها... والإخشيدي بيدو كانو يفهم شوية في القانون الجنائي الدولي.. لكلهم يعرفو انها موش بش تتنفذ..
لكنها ستسيئ للقضاء التونسي لدى قضاة الدول الديمقراطية.. خاطر تنفيذها يكون من طرف القضاء في البلدان الي فيها قضاء مستقل كيف فرانسا...وغيرها...وهاذم يطلبو نسخة من ملف القضية ويشوفو هل هي قضية حق عام عادية او تهمة سياسية... وهل ان المتهم بش يتمتع بمحاكمة عادلة او لا…
فبحيث... الخرافة هاذي متاع بطاقة الجلب المرفوضة مسبقا لأنها غير ذات موضوع جنائي... الهدف منها بعث الفرحة والغبطة لدى رعية الشعب الذي يريد.. بمزيد تجهيله.
وبحيث... ننصح سي المنصف المرزوقي ما يمشيش للسعودية والإمارات ومصر.... هاظوكم يسفروه بدون حتى قضاء غير مستقل...هذا كان ما خشقجوهش. .. لا قدر الله.. واندعاو انو ما جاهمش.
ويا والله أحوال هاك الحكم الفردي... قداش تفاهة.
هل أتاكم حديث الحفرة؟
توا بربي وقت يعاين رئيس الجمهورية شخصيا الحفرة …هاذي عمرها ما صارت فازة كيفها من قبل في تاريخ تونس منذ الإستقلال... وربما منذ حنبعل والله أعلم... وقيل انها تؤدي إلى محيط إقامة السفير الفرنسي..
ولما يعتبر الرئيس أن وراء النفق المكتشف تدبيرا وعملا إجراميا!!!! ثم يضيف أن الجهات الأمنية المختصة ستنير الرأي العام بكافة التفاصيل... عند انتهاء الأبحاث والتحقيقات!!!!
بربي ياخي هذا موش يعني ان الأبحاث ما وفاتش؟... وأن كل شيئ جايز... والحكاية تنجم تكون مخطرة... كيما تنجم تطلع حكاية نفطي؟
لكن السيد الرئيس... هاو حكم فيها سيديجا على أنها تدبير وعمل إجرامي والحكاية مازالت عند الباحث المناب من طرف القضاء... خاطر إلي بش يقرر بعد انتهاء الأبحاث... انها ممكن تكون جريمة... او موش جريمة ويحفظها... هو السيد وكيل الجمهورية دون سواه....ولا دخل لرئيس الدولة في الموضوع.
وزيد ياخي توا بربي يساعدنا أحنا انو يكون عمل إجرامي... يعني حسب القانون التونسي ذي طبيعة ارهابية... وقت قاعد يتقال اننا انتصرنا على الارهاب؟
فبحيث… فهمتو توا علاش نقولو يلزمو يهز يدو على النيابة وما يكونش رئيسها.. ويهز يدو على القضاء ويخليه يخدم على روحو… وما يلزمش المسائل هاذي تتوظف سياسيا تحت غطاء محاربة الفساد؟
وزيد هو غير قادر على محاربتو الفساد… خاطرو سلطة تنفيذية… وموش قضاء.. وهذا هانا لكلنا نعاينو فيه في الممارسة منذ الإنقلاب…وموش بالبلف..