وقت كانت الرعية تغني وتقول لبن علي ربي يرحمو : الله أحد الله أحد.. بن علي ما كيفو حد.. كنت وقتها نضحك..خاطرو كلام مليشيات رعية ...موش قادرة تستوعب انو مجرد إنسان...وأنو بالحق... ما كيفو حد. كان مثلا غير قادر يعمل خطبة ككل سياسي.. وديما يقرا علينا في الأوراق الجاهزة..إلي حظروهالو.. وزيد متحيل كبير على الشعب... ومع سابقية الإضمار والترصد زادة.
باش الشعب يفرح بيه.. عمل بيان 7 نوفمبر قالو فيه "لا ظلم بعد اليوم" ... لكنو بعد ما ركز روحو.. جزر الشعب مدة عقدين من الزمن .. وزيد استعرف رسميا في البيان أن عرفهم لول بورقيبة ربي يرحمو... كان ظالم.. وهو باش ينحي الظلم.
لكنو كان يفكر انو باش يزبد عليه... ياخي طور الماكينة.. وردها ترحي في المواطنين صباحا مساء ويوم الأحد.
وزيد كذاب كبير... وبالكبير زادة... عامل التعذيب والمحاكمات الجائرة سياسة دولة.. والجلادين والموظفين في القضاء يرحيو في الناس رحيان كل يوم.. ومانع الحريات السياسية... وهو يندعي بعين صحيحة وصحة رقعة.. انو رد تونس جنة حقوق إنسان.
وزيد..طلع فاسد كبير...والناس الميضوع هذا ما كانتش تتجرأ في عهدو تحكي عليه .. وهاذي فيها أحكام قضائية لا تحصى ولا تعد.. بعد ما هرب..كي الشجاع الكبير .
صحيح بن علي ما كيفو حد…
لكن فقط شاءت الصدف السياسية... ان بورقيبة عطاه ثيقتو في فترة صعيبة سياسيا.. ياخي في أول فرصة انقلب عليه. وزيد يا بوقلب نكل بيه ... عملو حبس خاص بيه... وسجنو فيه مدى الحياة.. بدون أي حكم صادر عليه... والراجل مسن ومريض..وما خلاهش حتى يكمل حياتو.. بين عايلتو وأحبابو...
عاد توا هذا ثمة شكون كيفو؟
فبحيث... أنتم سيب عليكم بربي.. من ترويج الإشاعات... متاع ما كيفو حد وكذا…