معملين منذ الإنقلاب على التسلق في فاڨونة القيسون…

كل ما نشوف واحد قلب الفيستة على القيسون بدون توضيح علاش... بعد ما ساند الإنقلاب على دستور الثورة... نقوم نضحك.. موش على حاجة راهو... خاطر ولات موضة ليامات هاذي…

يجيبهالك في قالب تنبيرة كلي كلي عفوية.. وما يقولش علاش قلب الفيستة على القيسون ...كيف مثلا استغلال تنبيرة الطبيب والسبيطار إلي عملت البوز...أو الفازات الشفترية القيسونية العجيبة... الخ.. نورمالمون يلزم يقولولنا علاش بدلو موقفهم.. بعد ما ساندو الإنقلاب... ولقاولو تبريرات من الحيط... وبرشة عملوها ال........... حاشاكم... وبقلبهم وربهم زادة .... هوكة مارك يشهد عليهم.. كان ما فسخوش سيديجا ما نشروه.

وثمة حتى شكون بكل صحة رقعة.. خون المعارضين للإنقلاب على دستور الثورة ومكاسب الثورة القليلة ... إلي تحققت في عشرية "الخراب" و اتهمهم بكل وقاحة وعين صحيحة باقذر ما عندو في طاست مخو...

وهذا في عوض يفسرولنا موقفهم الجديد..من الدستور القيسوني.. والبني القاعدي... و تزوير الإنتخابات لتنصيب مجلس تشريعي صوري.. وفشل القيسون في المجال الاقتصادي والاجتماعي.. وتجويعه للشعب الذي يريد.َ.واعتداءاتو المتواصلة على الحريات وحقوق الإنسان المدنية والسياسية للخصوم السياسيين... والشعب الذي يريد...ومراسيمه الفاشية كيف المرسوم 54 ضد حرية التعبير...الخ…

خاطر الواحد ما يأيسش من خلق ربي... شكون يعرف؟.. يطلعش عندهم رأي سياسي من هذا لكلو. لكن الجماعة هاذم طلعو ما عندهمش وعاملين فيها موش هنا... هكة بجرة قلم يقلبو الفيستة كيف ما يتنفسو... وفي بالهم عداوها علينا..لكن يبطى شوية.

موش مستوعبين انو لكلنا نغلطو خاطرنا بشر... ولي يغلط منا من حقو يتراجع ويستعرف بغلطتو... وما ثماش فرق بين المواطنين في الميضوع... عاد وقت نقرالهم هاذم مثل تلك التدوينات او المشاركات... يزيدو يطيحو من عيني... لأنهم موش صادقين.. لا مع أنفسهم.. ولا مع لخرين. وانا شخصيا نحترم برشة الصادقين.. إلي وقت يغلطو يقولوها بالوضوح.. مسألة أخلاقية قبل ما تكون سياسية..

وهي زادة سياسة وبالأساس...و يزيدو يكبرو في عيني... الله غالب رباية.. تربيت بيها...

ووقت نقرالهم تدوينات متاع قلبان فيستة سرية كيف هاذي الجزء الماكيافلي والشرير إلي في طاست مخي ولي ديما نحاول نتحكم فيه...كيف ما عنا لكل خاطرنا بشر... يقلي تلقاهم الوصوليين هاذم .. إما فشلو في تلقيط التزكيات.

أو انهم كانو معملين منذ الإنقلاب على التسلق في فاڨونة القيسون... ياخي طلعت ليهم بالدة.. ومصمصو بعد مدة طويلة... وفهمو انهم باش يبقو يسفو التراب.... وين حطو رواحهم يوم 25 بإرادتهم.

Poster commentaire - أضف تعليقا

أي تعليق مسيء خارجا عن حدود الأخلاق ولا علاقة له بالمقال سيتم حذفه
Tout commentaire injurieux et sans rapport avec l'article sera supprimé.

Commentaires - تعليقات
Pas de commentaires - لا توجد تعليقات