بالرسمي.. قيس سعيد إنسان نظيف وصريح ومواقفو واضحة...وانتم إلي ما تحبوش تشوفو... ولاّ عاملين فيها ما تشوفوش.. قيس سعيد نظيف خاطرو كان أستاذ في كلية... يخلص من عند الدولة.. وموش داخل في ميدان الإقتصاد إلي هيكليا فيه برشة فساد.. والمترشح سعيد منذ ترشحه... وقبل ذلك... كان صريح معاكم.. وعبر على مواقفو بكل وضوح…
مثلا وقت عمل انترفيو في جوان 2019 مع الصحفية كوثر زنطور... وقال بكل صراحة رايو في آش بش يعمل كان يقع انتخابه.. وجاب بيه 660 الف صوت... وانتم الي دعيتو للتصويت ليه في الدور الثاني ضد الفساد...وصوتولو... كأنو ما ثماش التصويت الأبيض... ياخي لمد بفضلكم قدهم أصوات... بأربعة مرات وقيس سعيد كان معاكم صريح...
موش قاللكم انتهى دور البرلمانات وانتهى دور الأحزاب يعني دوركم وانتهى عصر الديمقراطية التمثيلية؟ وياخي سمعتوه نهار يستعمل عبارات مثل ديمقراطية... وحقوق إنسان وحريات؟ ومساواة بين الجنسين؟ هو يستعمل عبارات مثل العدل وأحكام الشريعة مثلا في قضية الإرث..
مالا شبيكم عاملين فيها ما في بالكمش؟ تغالطو في رواحكم ولاّ في المواطنين؟
وموش قاللكم دستور الثورة اكله الحمار؟ ...وانو يحب يرجع للدستور متاع 1959..هاك إلي لا فيه سلطة قضائية اصلا موش حتى صورية ونطالبو باستقلالها...ولا محكمة دستورية... ولا هيئات تعديلية... ولا فيه سلط لامركزبة ديمقراطية خصوصا مجالس جهوية منتخبة مختصة في التنمية الجهوية... ولا فيه ضمان للحقوق والحريات... ولكلها هاذي من استحقاقات الثورة فرضتها الحركة الديمقراطية بعد نضال عقود ضد الإستبداد... والناس لكل تعرف ان دستور 1959 أسس وأثث لنصف قرن من الإستبداد... ولاّ موش هذا التاريخ القريب؟
ياخي حكالكم السيد سعيد على برنامج اقتصادي واجتماعي كيف ماهو موجود في كل الدول الديمقراطية؟ عدى تشجيع مشاريع محلية يعملوها شباب؟... او فاسدين تجبرهم الدولة يستثمرو في المناطق المحرومة؟
ياخي حكالكم على قوانين لتنفيذ برامج تنموية اقتصادية واجتماعية عصرية كيف ما انتم تطرحو فيها في دولة عصرية؟ ... طبعا لا والدليل انو في عامين ما قدم حتى مبادرة تشريعية... لا كيف ما تتصوروها انتم ...ولا حتى كيف ما هو يتصورها…
وكان نزيه معاكم... موش قاللكم ما عنديش برنامج في المجال الاقتصادي و الاجتماعي...قبل الانتخابات؟ وبرنامجي هو ما يريده الشعب... والشعب هو الذي يريد؟ وانا علاقتي مباشرة بالشعب موش بالأحزاب إلي ماعنديش علاقة بيها... وما نحبش نعمل حزب ؟
وياخي باش وعدكم قيس سعيد وقت عمل إنقلابو على الدستور...باستعمال عبارة "الخطر الداهم" الموجودة في الفصل 80... وموش بتطبيق الفصل 80؟ كان زادة نزيه معاكم.... ما وعدكم بحتى شيئ!!!
وانتم إلي طلبتو منو تنفيذ خارطات الطريق متاعكم...وقت كنتم تعرفو انو خارطة الطريق متاعو قالهالكم مرارا وتكرارا في خطبه...وانتم عاملين فيها لا تشوفو لا تسمعو....وقت هو ينفذ فيها..
ياخي تفهمو في السياسية.. ولاّ ما تفهموش؟
والأنكى انكم احنيتم ظهوركم للشعبوية الفايسبوكية..... قالك ثورة شعبية.... موش عبارة شعبوية أصح؟ وقت ان دوركم وواجبكم كأحزاب ومجتمع مدني و هياكل وسطى في المجتمع انكم ترفعو من وعي الناس موش اتبعوهم في لا وعيهم وتسيرو وراء الرعية منهم .. وموش الإنحناء للشعبوية ...هذا كان موش الإنجرار وراء السقوط الأخلاقي والحضاري للصفحات المشبوهة الي تروج لأرذل ما في الإنسان ...
وفي الاثناء الرئيس يسير... يسير... في الطريق الذي رسمه لنفسه وانتم وراه... وهو موش حاسبكم...وموش باش يحسبكم ... خاطركم خارجين عن تصوره المذكور…
يعني إنتم آوت...هاش آس عندو... وزيد تصفقو يا بوڨلب .
و اليوم... أهوكا واضع... بيكم وبمساندتكم...اليد على كل السلطات.. وعزل من مفاصل الدولة البعض من جماعة الوسادة... وحط جماعتو فيها ومواصل كيف ما عملو إلي قبلو للإستحواذ على مفاصل الدولة... وما اختار منكم حتى حد.
وهذا بكلو مع انتهاك الدستور أيضا... في الباب المتعلق بالحقوق والحريات إلي ضحات من أجلها آلاف المناضلين طيلة عقود...للتفرهيد على الرعية الناقمة. والبقية ستاتي على الدزة هاذي ... مادامكم مواصلين غارقين في التصفيق.
كيف هاك العزوزة إلي هازها الواد مع البلاد... وهي ديما تقول العام صابة. فبحيث... يا والله أحوالكم... وش بش يكتب عليكم التاريخ ... يا بوڨلب.