يقولولك مثلا... عيني عينك انو الإنقلاب على الدستور... هو تطبيق للفصل 80 من الدستور ... وكأنك امي وما تعرفش تقرا. وتشوف مراسيم.. يبداو ب "بعد الإطلاع على الدستور" وتسمع كلام فيه تهم جزاف ضد خصوم سياسيين...بدون لا حجة... ولا دليل...ومن بعد كي تتكشف الحكاية انها نفطي عمرك ما تسمع تصحيح او اعتذار للضحايا…
وتسمع كلام فيه ان مسؤولين سرقو فلوس البيليك وحولوها للخارج...وهاذي حكاية مستحيلة وقت يتعلق الأمر بفلوس الميزانية.. وزادة كيف كيف... لا تصحيح لا اعتذار. وتشوف دستور جديد... فيه عيني عينك... حكم فردي مطلق رجعي ومقاصدي... ويقولو للخارج الماريكان والغربيبن إلي عندهم صرمية الميزانية ... يقولولهم باش يعملو بيه ديمقراطية... ويضمنو بيه حقوق الإنسان.
ويصوت ربع الشعب لدستور... ويقولولك.. الشعب اختار وموافق. وهاو حتى والي بوزيد حفظ الدرس... قاللكم بمناسبة حادثة الصمعة ان عرفو "يرفض رفضا قطعيا شخصنة السلطة" الخ... والقايمة راهي ما زالت طويلة برشة برشة... على قد ايام الفترة إلي تعدات منذ الإنقلاب.. وأكثر .
فبحيث...راهم يعرفو انهم يغالطو في الشعب وهذاكا عندهم ماعون خدمة... وما يمشيش في بالكم العكس...خاطر يفهمو في القانون... مثلا ينجمو يفهمو الفصل 80... وهوما موش أميين. لكنهم يتوجهو اولا للشريحة الناقصة ثقافة سياسية... وتصدق كل ما يقولوه.. وشفنا مشاتل من بين الأشخاص الطبيعيين في حملة الدستور..
وزادة يعرفو انو ثمة في المجتمع عديد الشرائح من الوصوليين.. و الانتهازيين... و الثقفوت النظروت متاع البلاط .... إلي بالضرورة باش يقدمولهم خدماتهم... ويعتمدو عليهم في مغالطة الجماهير حتى بدون تكليفهم بمهمة...وخدمتهم يفتشولهم على التبريرات.. ويروجولهم الفارينة لدى الجمهور..
وبحيث… سياسة الكذب على الجماهير تشهرو بيها الفاشيين.. ونظرلها مثلا ڨوبلز متاع هتلر وقت قال بما معناه اكذب اكذب لازم يبقى منو.. لكن اعتمدتها أيضا الأنظمة الشمولية والشعبوية والإستبدادية في مختلف بلدان العالم… مع سياسة إخفاء الحقيقة.. واللغة الخشبية.. الخ..
وعلى هذكا مثلا من اول الإصلاحات بعد الثورة… كانت معركة الشفافية… والوصول للمعلومة.. في تحصل… هي معركة إعلامية متاع معرفة… معرفة الحقيقة… هوما يكذبو… وانتي اكشف الحقيقة… حتى تتشلك سمعتهم في مخيلة الجزء من الجمهور المعملين عليه…
مع الحذر الشديد من السقوط في مستواهم… في مستنقعات الافتراءات والسب والشتم… إلي يتميزو بيها عن المواطنين الصالحين… وقتها نوليو ما عملنا شيئ..