عبير راهي ضد دستور 2014... وعندها دستورها الخاص...عملتو وحدها كيف القيسون . وزادة هو متاع حكم فردي... كيف دستور القيسون... وتحب تعديه باستفتاء بعد ما تشد مجلس النواب.. لكن هذا بطي شوية بعد الإنقلاب.
وكانت تخدملو لعام 2024...وقت تربح التشريعية... وهذا قالتو مرارا قبل الإنقلاب...لكن الإنقلاب قطع عليها الطريق. عاد فرحت بالإنقلاب.. في بالها كان ضد الغنوشي.
وبعد الأمر نومرو 117 متاع 22 سبتمبر.. فهمت بعد شهرين يا بوڨلب... انو ضدها وضد حزبها زادة وقت جماعة القيسون بداو يروجو ان الأحزاب أصبحت من الماضي…
وفهمت وقتها ان القيسون دوبل عليها... خاطر لوكان حل المجلس وعمل انتخابات تشريعية ووضع حد للفترة الاستثنائية... تجي هي الأولى وتعوض كتلة الغنوشي في الصدارة . لكنها وقت أعلن القيسون انو باش يعمل دستور جديد متاع جملكيتو الجديدة ويعرضو على استفتاء .. بطلت من الإعتصامات بمونبليزير وضد القرضاوي ... وأعلنت الزحف على قرطاج.
وطبعا ما شاركتش في الإستفتاء... ودعات لعدم المشاركة.. و الغريبة اني ما شفتش ذبان أخضر يسب فيها.... ولاّ من طرف أحزاب الديكور والفارينة للجملكية الجديدة…
وحتى من هاك الجزء من اليسار إلي باع الطرح للقيسون .... كيف ما سبونا.أحنا جماعة المقاطعة من أجل الدولة الديمقراطية المدنية... وحقوق الإنسان في مفهومها الكوني والشمولي ... تي برا أكاكا. وبعد الإستفتاء الفاشل ... قالت إن الإستفتاء فشل...وطبعا تحققت ان دستورها ولاّ يبطى برشة.
عاد زادت دخلت وخرجت في الحلة...وقت ماعادش تعرف بيها وين.
وهكة تعمللكم ندوة صحفية وتقترح حوار... مع روحها....باستعمال شعارات... مثل ديمقراطية... ووطنية وسيادة.. الخ... شعارات خاطر ما عناش نفس المفهوم ليها كيفها. وطبعا موش على أساس حقوق المواطنة.. وإنما كيف بن علي باستئصال المواطنين إلي يحملو في أمخاخهم توجهات الإسلام السياسي…
وطبعا موش من أجل المساواة التامة بين الجنسين دون تمييز... كيف يقول الفصل 21 من دستور الثورة... هي ضدها.. الخ.. وطبعا موش على أساس دستور القيسون... وإنما بعد ما مصمصت من دستورها عملت كنسسيون. قتلك تحب حوار على أساس دستور الصادق بلعيد.
و تعرفوش علاش... خاطر هذاكا زادة.... متاع حكم فردي... وحط رئيس الجمهورية فوق كل الهيئات الدستورية... وجعل من السلط مجرد وظائف... الخ...كيف وقت بن علي. وقت المعارضين لدستور القيسون لكلهم ضد هذا.
وعاد زادت دخلت وخرجت في الحلة اكثر... لأنها لقات روحها تعوم في الناشح...لاهي قابلة بدستور 2014... ولاهي قابلة بدستور القيسون واكدت عليه وقت تقلك هي ضد صراع الشرعيات.... وراصلتلها متشعبطة في دستور بلعيد.
فبحيث...ثبتي روحك عبير... انتي وين؟