يفسكيو على حكم بن على... إلي كان مبني على الخوف من الحاكم و ناسيين انو نهار إلي تنحى الخوف... بن علي هرب. وقت بن علي كان الخوف من الحاكم . ..باستعمال جهاز الأمن (الحاكم عند الناس) للترهيب.. بما فيه ترهيب الأمنيين وقت ما يطبقوش التعليمات الإستبدادية... وكي تقلو علاش هكة يقلك تعليمات... وثمة شكون مثلا قالي شخصيا بكل وقاحة تبكي امك وما تبكيش أمي يا أستاذ..
وكذلك بتوظيف جزء من القضاة...وموش لكلهم كيف ما يخلوضو برشة حمقى موش مطلعين على الممارسات وخفايا الأمور وما يفهموش في طينة الناس.. والتوظيف يكون خصوصا بتهديدهم بالدوسيات والنقل التعسفية...وهاظوكم يتعينو منهم برشة في المسؤوليات وفي مفاصل الجهاز القضائي للتحكم فيه عن طريقهم.. بتطبيق التعليمات..
وكذلك بنشر قوادة التجمع في المقاهي والأحياء... للوشاية بالناس بالأستفيدات.. وترهيبهم من الحديث في السياسة... وايضا بإطلاق اليد لصحافة المجاري لدوس كرامة المعارضين لبن علي والإفتراء عليهم والتشهير بيهم... بحماية سياسية وقضائية... وبمساعدتها بالتمويل من المال العمومي عن طريق وكالة الإتصال الخارجي سيئة الصيت..
فبحيث...اليوم الخوف من الحاكم قاعد يرجع... والحكاية منظمة... وما يمشيش في بالكم العكس... توليو وقتها نيات . كانكم من الأمن الجمهوري هانا نستناو فيه... خصوصا هانا نشوفو في ممارسات بعض النقابات الأمنية... والإحالات من اجل الإعتداء على أعوان.... ضد الضحايا المعتدى عليهم...الخ…
وكانكم من استقلال القضاء...هانا كل يوم نشوفو في القضايا غير العادلة ضد الخصوم السياسيين بتعلة محاربة الفساد...إلي لا تحترم فيها لا قرينة البراءة ولا انو الإيقاف التحفظي وسيلة استثنائية في القانون.. وذلك تحت الضغط الإخشيدي المتواصل على القضاء…
عمركمشي بربي سمعتو رئيس دولة في العالم يقول أنو يحب يتراس النيابة العمومية؟ كل الدكتاتوريبن إلي عملوها يحشمو بش يقولوها.. بالعكس يندعيو ان القضاء عندهم مستقل.... أحنا عنا دكتاتور كارت سير تابل.
وزيد هاو السيد كلف وزيرتو للعدل بش تعملو مشروع مرسوم مجلس أعلى للقضاء على قد صباتو... بش يعفس بيه على الجسم القضائي....ويقررو وحدو ويهبطو في الرائد الرسمي كقانون...وحتى حد ما عندو الحق يناقشو فيه ولا يتظلم منو.. لا سلطة تشريعية ،ولا محكمة إدارية ،ولا دستورية، ولا هم يحزنون...حتى بن علي ما عملهاش .
وطبعا كل ذلك بتعلة محاربة الفساد.... وهاذي ياسر اتضحكني.
وكانكم من قوادة التجمع والأستفيدات... هانا كل يوم نحلو الفايسبوك عالصباح...نلقاوه معبي بالأستفيدات العلنية موجهة راسا للإخشيدي.. ضد فلان او فلتان مع برشة جرائم افتراءات وشتم وسبان ...وكإنو ما ثماش نيابة عمومية في جهاتهم.. وعندها الولاية الحصرية ويقدمولها الوشايات...
يا حسرة على وقت بن علي... كانت الأستفيدات تصير بالسرقة تحت حس مس....وبلاش فضايح....القوادة ما عادش عندهم أخلاق .
وكانكم من صحافة المجاري... هاني اكتسحت الفايسبوك...وديما مع الإفلات من العقاب...بغطاء سياسي ضمني... ميليشيات فاشستية مجرمة "تفسر" في كلامو بالإعتداء يوميا على معارضيه... والمشرفون على الإعلام في قرطاج عمرهم لا نددو بيهم ولا حتى تباينو صراحة مع ما يقترفونه من جرائم يومية.... ويغالطو في الناس بجملة تسخف... فضفاضة وشعبوية ومجترة وركيكة... "حد ما يتكلم باسم الرئيس"
وبحيث.... قصر قرطاج للحاكم الفردي... قاعد ينظم اليوم في تطبيق سياسة الخوف من الحاكم... في المجتمع... وفي كل المجالات الي عندو يد عليها او فيها... باستعمال جهاز الدولة.... وبالتخويف بالملفات الصحيحة والوهمية والمفبركة…
والدليل انو الخطابات لتوجيه تهم الفساد ديما هولامية.... وغير دقيقة... وديما تتعلق ضمنيا بخصوم سياسيين... وديما حتى واحد من الحشد الشعبي ما طالتو الاتهامات هاذي... وقت الناس لكل تعرف انو فيهم لصوص وفُساد ومجرمين.
وبحيث.... إلي يخاف بعد تجربة بن علي... ليه ربي والعضعدية.... ولي ما يخافش نجا…