فضولي السياسي... دزني باش نخصص ساعة كاملة من حياتي لمتابعة موزاييك على iptv...بين الواحدة والثانية اليوم...لمشاهدة سي المواطن الي يصحح بياناتو السياسية الإنقاذية باسم "الأميرال العكروت" ...وهو رسميا "اميرال كان" ...خاطر ما عادش في الخدمة..
عاد بعد ساعة كاملة من المشاهدة والاستماع والتركيز... تجي تحل الصرة تلقى خيط... كلام شعبوي عام فارغ... لا مشروع... لا برنامج... ولا كاريزما.... ولا قدرة على الدمغجة للتمظهر بالزعيم الشعبوي... والو.... نيات... ريان…
السيد عداها ساعة كاملة وهو يعاود في كليشيات توحيد...خلفيتها حول شخصو المفدى ... كيف الديسكو المكسر...بآداء إعلامي يقارب الصفر... وزيد في لخر استعرف انو يتفق مع عبيريرة بن علي في 80٪... وما قالش فاش…
ومن غير ما نقوللكم شنوا الخلاف على العشرين في المائة الباقين ... خاطر العبيرة قالتها.... قالت انو يحفرلها في قواعدها التجمعية الي يجتمع بيهم في ظهرها ... للإنقلاب عليها والحلول محلها... وشهرت بيه..
وهذا موش غريب... العقلية الانقلابية متاع بن علي تجري في عروقهم الشتل هاذم...ومازالو يتقاتلو على تركة التجمع المنحل منذ عشرة سنين.. المهم... والغريب... انك تلقى مغفلين يحسبوهم منقذين…
والمشكل موش فيهم الشتل هاذم… عندهم مصالح داخلية وجيواستراتيجية يخدمو فيها… وموش في البلاد… المشكل في المغفلين… هوما إلي باش يكونو المسؤولين على مزيد إغراق تونس في المستنقع… بمساندتهم للمشاتل السياسية هاذي… لوكان يعاونوهم على الوصول للسلطة… لا قدر الله…
يا والله أحوال…