هاذي راهي ما هيش في مدرسة خاصة.... هاذي في رمز الجمهورية المدنية.. يا بوڨلب... عاد الحدثوت النظروت عاركو الخليفة السادس... ياخي غطسو للعنكوش في الفارينة للخليفة نومرو 117. ربي يجبرلهم...ومازالو يساندو في الإنقلاب... وفي المنقلب على دستور مدني ديمقراطي.. ويندعيو انهم مع الدولة المدنية... والمساواة التامة بين الجنسين.. وكذا. سكيزوفرينيات تمشي على كرعيها.
فبحيث....ولعلمكم…
في دستور البني القاعدي الموجود توا في الخزانة... ولي باش يعرضو المنقلب على استفتاء.. ولي باش يكون طبعا مدلس للسيادة الشعبية... بعد الاستيسارة الكاراكوزية... والحوار بدون حوار مع القوى الحية في المجتمع... كيف ما عمل بن علي قبل عام 2002...وموش بعيد... في موعد 25 جويلية المقبل... بإشراف هيئة انتخابات موظفة وتخدم عند الطلب …
راهو يا فارينيين للإنقلاب والمنقلب... لا ثمة الفصل 2 متاع الدولة المدنية... ولا ثمة الفصل 21 متاع المساواة التامة بين الجنسين بدون تمييز...الموجودين في الدستور المنقلب عليه... وما تنساوش زادة الفصل السادس من الدستور إلي تهكم عليه المنقلب ...
وهاذي راهي من أسباب الإنقلاب على الدستور كان عاملين فيها ما في بالكمش... وقالها سيديجا المنقلب...في خطاباتو... تارة بالوضوح... وتارة بالتلميح...والجماعة عاملين فيها موش فاهمين...
ومتناسيين انو دستور الفصل 2... والفصل 6...والفصل 21...إلي موش موافق عليهم المنقلب عليه... والمتآمر عليه وكأنو الخليفة نومرو 117.... راهو وافقت عليه كل الأطراف السياسية في 2014... وبمن فيها النهضة... مع حماة الحمى والبوس والتعنيق...وهوكا الفيديوات موجودة في اليوتوب…
وبحيث... هذا نقولو لقلابين الفيستة على الدستور ... ولي عاملين فيها متناسيين انهم صوتو عليه مع النهضة وتوافقو عليه معاها... وهاي اليوم هي من بين القوى إلي تدافع عليه.. وهوما عاملين فيها صك تربح.
عاد الجماعة عاقلين الدنيا بالنهضة.... وموش بوصلتهم قيم المواطنة وقيم الجمهورية والدولة المدنية وحقوق الإنسان والمساواة بين المواطنين والديمقراطية المكرسة في الدستور المنقلب عليه ... ولي يخدم المنقلب باش ينحيه... خاطرو يحب يكون حاكم فردي مطلق ولا دولة مدنية ولا هم يحزنون…
وهوما مازالو يساندو فيه وزيد يقلك ندافعو على الحداثة....إيه صحيح.... الحداثة متاع وقت عصور ناس بكري... متاع الحاكم المستبد متاع عصور الانحطاط. وبحيث...هذا يعني انهم هوما والحضارة الإنسانية وقيمها العصرية خطان متوازيان لا يلتقيان .
وبحيث... وين كنا... ووين باش نصبحو..يا بوڨلب.. والجماعة ما زالو يعملو في الفارينة للخليفة نومرو… نسيت حتى النومرو قداش... و يحكيو على الحداثة.
يا والله أحوال..