وقت كانت الفارينة والسميد مقطوعين عند محلات البيع بالتفصيل... قلنا هدَا إحتكار متاع مجرمين كبار... وكلي كلي عملنا مرسوم ضد المضاربة تقولش عليها الحكاية تتعلق بتنظيم بورصة لندن... وللتصدي لتجويع الشعب.. من طرف ها المحتكرين المجرمين...وموش لعب الحكاية راهي العقربات حتى بالمؤبد يا بوڨلب.
توا عاد بعد هذا المرسوم الشهير... إلي باش يبقى في التاريخ... خلطت عليها حتى المخابز.. إلي تشري السميد والفارينة بالجملة...هاك إلي يجيبوها من الخارج.. وما عادش عندهم فلوس باش يخلصوها...والبابورات تقعد تستنى وما تحبش تفرغ... حتى تخلص بعد الثلاثة سيسيات متاع امك صنافة.
وهذا طبعا من جرة سياستهم الاقتصادية والمالية الحكيمة... متاع البني القاعدي الثوري النوري الكلمنجي...متاع خطابات عقاب الليل. عاد يا مواطن... يلزمك توا بعد ها الإنقلاب القاعدي... تشد صف طويل... وشوف وشوف كان خلطت على باڨات...ميكانش يقلك ارجع بعد ساعة أو ساعتين... كان كتبلك ربي…
وزيد يا بوڨلب... هي بيدها الباڨات تلقاها ساعات وقت تخلط عليها.... شربت بالطول... والعرض زادة... تقولش عليها شاحت بنفخان الريح متاع خطابات عقاب الليل. وزادة ثمة سؤال كبير...زعمة نلقاو ملسوقة وعضام... في الشهر الفضيل؟ خاطر توا ماعادش تسأل على سوم الباڨات بعد ما تتعب وتشد صف طويل... آما تلقا ولاّ ما تلقاش.
لكن ثمة شكون يقول انو الحاجة الباهية في كل ها التمخوير متاع السياسة الاقتصادية الحكيمة متاع انقلاب الشعب الذي يريد...انو ما عادش باش يكون ثمة تبذير... التوانسة ما عادش باش يلوحو الخبز...وأصبحو عايشين بالبايت...حتى لوكان يكون مخزز.
آنا مثلا مرتي ترفض تشد الصف الطويل متاع هاكا تخلط ولا شوف وشوف... ومبارح مثلا سخنت خبز متاع نهارين. وبربي موش ياخي يقولو انو الخبز المخزز يستخرجو منو دواء البينيسيلين؟ ولا آنا غالط؟
إذا كان هذا صحيح.... نخاف على الدزة هاذي... لا يهبطلنا مرسوم... ضد المضاربة في الخبز المخزز... وقت ماعادش تكون ثمة أدوية في السوق. وربي يستر تونس وشعبها...من التبعات المقبلة لها الإنقلاب البوجادي المشؤوم...