بالحق.. ثمة حاجة موش تحب تدخل لطاست مخي...الله غالب تلقاه كاسح... خاطر القانون الجنائي يقول هكة. توا احنا عنا عشرة سنين نلومو... و نطالبو في القضاء باش يتحمل مسؤولياتو ضد إلي يخالفو في القوانين...كيف الفاسدين إلي سرقو أموال البيليك... ولي مولو انتخاباتهم واحزابهم بالمال الفاسد... والإرهابيين... وقتلة الشهداء... والمهربين إلي بركو اقتصاد البلاد... والمحتكرين إلي يمصو في دم الفقراء. .. الخ.... وهاذم راهم ما خالفو كان قوانين...
لكن وقت يجيك واحد... وموش فقط ينتهك الدستور في بعض فصوله... إلي هو بو كل القوانين... وأعلى قانون.. وما يكرف قدامو حتى قانون...ووقت هو عقد اجتماعي بين القوى الحية في المجتمع باش تتعايش مع بعضها...وتتنظم بيه الشرعية الدستورية إلي تعبر عن السيادة الشعبية... دون سواها...
وهذاكا موش ما اتدورش بيناتها حرب أهلية.. كيف ما يحصل مثلا توا في ليبيا والسودان... وين كل طرف يقلك آنا نمثل السيادة الشعبية وحدي... أو آنا "المشروعية" كيف ما يندعي سيدنا توا... الخ..
ويجيك ويقلك هكة... وبكل عنجهية وفي بالو الدنيا مسيبة ... أنا راني قررت آنو ماعادش ثمة دستور...ولي نقولو نا هو الدستور. ويڨولها.... ويزيد يڨوللنا من أنتم؟ ونڨولها وكان عجبكم وانتم كولو ولا طيرو ڨرونكم... وكان ظهرلكم برو روحو لكتب الجغرافيا... وكان عندكم ريح ذريو عشرة.
وزيد يا بوڨلب... تلقى شكون في بالو يعمل في الفارينة...وفي بالو يعبر على موقف سياسي... ويقلك هذا من حقو!!
عاد حبيت نذكر هؤلاء المغفلين... راو عنا فصول مخطرة برشة في المجلة الجنائية تحكي على الموضوع هذا... وموش كان ضد إلي يعملها... زادة ضد إلي يشاركو فيها... بالعكري تتسمى junte....وزادة..... Quarteron de... هاكم جماعة القانون الدستوري الإنقلابيين يفهموها... صارت في التاريخ القريب في دول أخرى.
وزادة راهم مجرمين في المجلة الجنائية... حتى إلي يساندو فيها. فبحيث...برشة نقرالهم... ويحسبوها سياسة وحرية تعبير... كيف هاك إلي يطمز عينو بش يتحسس الثنية.. ويظهرلي هاذم نساو... أو تناساو... هاك الجماعة إلي زارو ألمانيا بعد الثورة... وتهمهم راهي كانت خفيفة... بالفصل 96 من المجلة الجنائية..
آما في المرة هاذي...راهي الفصل 60 وما بعده يابوڨلب. عاد ثمة شكون من جماعة الفارينة في بالو ينظر... قالي ماو في 2011 زادة نحينا الدستور. السيد عامل فيها مهف... ويقارن فلي ما يتقارنش... طلع موش في بالو انو وقتها صارت ثورة... ومولى الدستور متاع الحكم الفردي والرئاسة مدى الحياة هرب. وقعدت البلاد بلاش رئيس... والشعب عملو ديقاج. ... ويوم 14 وموش 17.
وتوا الرئيس المنتخب موجود... وهو المنقلب على الدستور إلي انتخب للحفاظ عليه... وحلف عليها على المصحف... وقال انها أمانة بين يديه...وشهد على روحو يا بوڨلب قدام ربي بعدم خيانة الأمانة بربي راجعو خطاب آداء اليمين متاعو.
وبحيث... شكون يعرف على الدنيا... وتغيير ميزان القوة السياسي... زعمة خاطر السيد أصبح رئيس الأمر الواقع.. لوكان دامت لغيرو راهي ما وصلتلوش؟ وموش جدودنا قالو الدنيا ما فيهاش آمان؟
تي هو بن علي ومندراك وهرب بعد 23 سنة من انقلابو...وحتى واحد ماكان يتصور هذا قبل بنهار. والقضايا والأحكام ضدو بالسجن أصبحت كي البطاطا وقت تبوخ.
وهوكا لتوا مازال مدفون ربي يرحمو في الغربة... ويلزم نرجعوه لبلادو... خاطرنا موش كيف الانقلابيين...عنا أخلاق...