نعفس فيك وعليك... وتعفس فيا وعليا... باش نتوحدو
عاد نتفرج من قبيلة في برنامج حول الإنتخابات الرئاسية الفرنسية .. في تلفزة خاصة عكرية ذات توجه يميني مكشوف... عاد كرونيكار قال تعليق على علاقة حزب ميلنشون ببقية أحزاب اليسار بالنسبة للإنتخابات التشريعية المقبلة... الي تجي بعد الرئاسية... وهي الي تحدد الحكومة الي باش تحكم.. وموش رئيس الدولة.. دستورهم يشبه لدستورنا... ووقت تنجح معارضة الرئيس في التشريعية هي الي تحكم... وهو يبقالو الدفاع والخارجية... اسمها وقتها cohabitation
وفي التشريعية الفرنسية المقبلة.. اليسار لوكان يتوحد من توا حول برنامج حكم ومرشحين متفقين عليهم قبل الدور الأول... عندو امل يربحها بنظام التصويت على الأفراد في دورتين... اعتمادا على ميزان القوة السياسي للدور الأول في الرئاسية...خاطر يكثر الأمل باش يترشحو للدور الثاني... ضد إما مرشحي ماكرون.. أو لوبان..
عاد السيد اليميني فلقني بالضحك... خاطرو طلع يعرف اليسار اكثر من برشة يساريين. قال بالعكري مخاطبا الي معاه في البلاتو:
Vous savez? Pour la gauche l'union est un combat. Pour eux l'important c'est qui domine le reste de la gauche et lui impose ses vues.
تقولش عليه يحكي زادة على تونس… وقت المتسكترين ينظرولك على الوحدة والصراع… والخلفية هي.. مني وحدي تخرج ميكانش لا حلت لا ربطت. فبحيث… نسبك ونعفس فيك… باش نتوحدو.
وعلى هذاكا اليسار قعد متشتت ومعارض… وما عندوش برنامج حكم…وتتجاذبو الإنتهازية السياسية الحانوتية.. وعلى هذاكا زادة تلقى حوانيت غير مأثرة في الصراع السياسي الوطني… وتصطف وراء انقلابي شعبوي..
ومن بين الأسباب موش ضرورة الصراع ضد هذا الإستبداد إلي ينتهك كل الحقوق المدنية والسياسية والاجتماعية والاقتصادية للطبقات والفئات المستغلة والمضطهدة…يعني الشعب الكريم…
خاطرها موش عندها السياسي هو المحدد… وهاذي من مسلمات تاريخ اليسار العالمي… ويكون ذلك مجسم في برامج حكم يجاوب على الواقع المعاش للشعب .. وهو يكون المحدد في التحالفات السياسية.. والتكتيك السياسي المرحلي مع بقية الأطراف الي تقربلو في البرنامج….
وإنما لضرورة الصراع ضد اليساريين إلي كيفهم… خصوصا وقت يختلفو معاهم في الموقف…بش يكونو مهفاة عليهم… وهي صبيانية مرضية.
في تحصل.. كيف توا بين إلي وقفو سياسيا ضد الإنقلاب ملول .. ولي مساندينو وشدو صحيح وما يحبوش يستعرفو بغلطتهم.. خاطر الصراع مع اليساريين لخرين… هو لكل… وموش مع الحاكم الرجعي المستبد .
وعلى هذاكا وقت تتسكر الدنيا في وجه جزء من مناضليه ويأيسو من إمكانية التغيير السياسي … يدورها بصفة فردية انتهازية.. سياسة الموقع قبل الموقف..