هاظاكم إلي تبقاو في هيئة الإنتخابات المنصبة...عملو ندوة صحفية وقالو انهم باش يشكيو بكل من اتهمهم بالتزوير. ضحكوني.. رئيسها المنصب يهدد... وعضدو ليمين يتحي ويزكي براسو. المشكل انهم مئات الآلاف من التوانسة المهتمين بسلامة الإنتخابات.. ولي عندهم تجربة في الميضوع .
وطبعا موش نحكي على الخارج... وخصوصا موقف لجنة البندقية المختصة في الميضوع... ولي اتهمت ضمنيا ان الهيئة المنصبة... تنصبت للتزوير. والمشكل الأكبر... انو جماعة الهيئة هاذم... طاسة مخهم موش قادرة تستوعب لليوم... انو مجرد اختيارهم هوما بالذات... وبصفة أحادية لتنصيبهم.... من صاحب مشروع سياسي... للإشراف على تنفيذ مشروعه... وتغيير قانون الهيئة... والقانون الانتخابي اسابيع قبل التصويت بالمراسيم الفردية والأوامر... هو لتمرير مشروعه... وموش من أجل انتخابات نزيهة وشفافة كيف ما صارت قبل بعد الثورة .
وربي اكثر من الجهل هذا في المادة الانتخابية ما ثماش... وهذا طبعا إذا كانو جهل بشروط الإنتخابات... وموش معرفة ومواففة مسبقة... وتنفيذ للميكماك "الانتخابي" متاع مولى نعمتهم. والدليل.... انهم وافقو على اعتبار ان مشروع الدستور مر... بموافقة ربع الناخبين المسجلين... فقط .
يا واله أحوال.. طلعو زادة ما يعرفوش الأصول في كيفية التصويت على الدساتير... هذا كان يعرفو ويعملو في الفارينة للدكتاتور. يعني الجماعة ما يصلحوش اصلا باش يشرفو حتى على مكتب إقتراع...يطبق تعليمات الهيئة الفرعية للإنتخابات. ويحبو الناس تقبل بالنتائج المعلنة من طرفهم.
يبطى شوية …
وزيد في عوض يبلعو سكينة بدمها... ويعملو فيها ما سمعوش عملو فيها أنو احسن دفاع هو الهجوم... يحسبوها كورة . بربي تراه يوريونا عرض اكتافهم ويشكيو... خلي تولي كل قضية فرصة للتشهير بالتزوير بالوثائق والمؤيدات ومعايير الإنتخابات ...وتكون فضيحتهم في الداخل والخارج مستمرة .
زعمة تجيهم السجاعة والتعليمات ويعملوها؟
خلي وقتها يولي مسلسل مكسيكي... نعديو بيه السنين المقبلة... في عوض شوفلي حل. وفوق هذا لكل الجماعة ما يحشموش... ماشي في بالهم وقت باش يواجهو المشككين..."بالقانون" هاظوكم المراسيم متاع الأمر الواقع الإنقلابية على دستور الثورة...وعلى قانون الهيئة الشرعية... وعلى القانون الانتخابي...إلي نظمو الإنتخابات السابقة في إطار الشرعية الدستورية ...والناس باش تقوللهم آمين هاظاكا هو القانون.
حتى هذاكا زادة يبطى شوية …
فبحيث.... لكلو يبين جهلهم المدقع بالشروط الدنيا المتعارف عليها عالميا... للإنتخابات الحرة والنزيهة والشفافة...وفي تونس بمقتضى دستور 2014... والقوانين المنبثقة عليه المتعلقة بالمادة الانتخابية... ولي وقع الدوس عليها بالجزمة يوم 25 .
ملاّ شتلة... طلعو ياسر مطلغين وجهلوت ... وقت يدور الحديث على الإنتخابات... والتزوير.