طارق الباباغيو…

Photo

طارق الي قال كيفاش الموظفين بعد ما حطيناهم في الحجر الإجباري نعطيوهم شهرياتهم كاملة... شوفوا مناقبو في قوقل.. السيد راهو إنسان فاشل... لكنو من حين لآخر يعمل شوشرة ضد جزء مهم من شعب الكادحين الي ينتج في الثروة وهازز البلاد على ظهرو.. باش يعمل البوز... والناس تحكي عليه..ماعون خدمة... وعندو مشكل مع انتفاخ الشخصية والأنا المتورم...

السيد هذا قريب من منظمة الأعراف الفرنسية (ميديف) .. وشغل رئيس مجلس رؤساء المؤسسات الإقتصادية تونس فرنسا... وكان قريب من نظام بن علي عن طريق رئيس حكومتو محمد الغنوشي إلى كانت علاقتو متطورة معاها...وكان يجيبلو في رجال الأعمال الفرانسيس..الخ.. شوفو الشيخ قوقل..

وبعد الثورة أقبل البدر علينا... وجابلنا العلم من فرانسا.. فعمل منظمة أعراف سماها كونكت في 2011...لكنها بقات تكوع لتو قدام منظمة الأعراف التونسية الموجودة من وقت الاستعمار...ياسر متواضع..

أما ساعات بحكم علاقاتو في الإعلام يجيبوهولنا... بعد ما يعمل ندوة اقتصادية "عالمية" متاع تفشليم... باش يعنعن علينا "دروس" ومواقف من قبيل ما تعملو مجموعات الضغط الأوروبية... متناغمة مع مواقف منظمة الأعراف الفرنسية الي تدافع علي مصالح مؤسساتها في تونس..

السيد هذا يقدم في خطاب في شكلو جديد وعصري ومتحضر... لكنو في محتواه متخلف وأنانى ونتائجو على المواطنين الي تخدم وتخلق في الثروة متوحش...

قال مثلا ان الإعتراضات الجوهرية على اتفاقية الأليكا في غير محلها...السيد يحب يزيد يدقدق قطاع الفلاحة غير المدعوم في تونس وقطاع الخدمات التونسية... وزيد بمنافسة غير شريفة لفائدة الفلاحة الاوروبية المدعمة من المفوضية الاوروبية بسياسة (PAC) ولفائدة قطاع الخدمات في أوروبا...

المهف هذا عندو سنين طويلة وهو يقول كيف الديسكو المكسر أنو الاصلاحات الكبرى عاجلة وآنية... ومن أبرزها عند سيادتو تخريب الوظيفة العمومية (وهانا شفنا وين وصلنا تخريبها في قطاع الصحة بمناسبة أزمة الكورونا... هذا من غير ما نحكيو على التربية والتعليم والنقل والسكن) ... ويقترح المهف هذا التخفيض من عدد الموظفين إلى النصف.. (مرة يقول 300 ألف ومرة يعمل عليهم مزية ويقول 400 ألف... ناسي أنو في فرانسا المعدل أكبر من تونس مقارنة بعدد السكان).

وبالنسبة لشركات القطاع العمومي يطالب سيادتو بتأهيلها... ثم بفتح الشراكة مع القطاع الخاص... بعبارة أخرى بفتح رأسمالها للرأسمال المعولم... بعد "تنظيفها" (إعادة الهيكلة) من طرف الدولة بفلوس الضرائب...يعني خوصصتها بطريقة غير مباشرة.. وبالطبيعة أرباح الشركات هاذي ماعادش تقعد في القطاع العام ويستفاد منها عمالها وموظفيها الي انتجوها ... وإنما تمشي لأصحاب السندات من تونس والخارج...الي لا يبلو لا يعلو وبرا شوف عاد الفلوس الي باش يحطوها في راس مالها كان ماهيش تبييض لفلوس الفساد بعمليات بنكية شفنا منها برشة في ويكيليكس..

وهو ضد الفساد... لكن موش بمحاربة الفساد... وإنما بالتقليل من رقابة الدولة على الشركات الموردة والمصدرة... مازال كان ما قالش سلملهم مفتاح الديوانية...

وهو مع الاهتمام بالمناطق الداخلية لكن بتقديم حوافز ومنافع جبائية إضافية للشركات باش تنتصب فيها... يعني قانون 9 أفريل خاص بالمناطق هاذي...وهو طبعا موجه أساسا للشركات الأجنبية...الي سيديجا متمتعة بقانون 9أفريل هاظاكا..

الخ... من الخزعبلات الليبرالية في نطاق العولمة المتوحشة وفي أبهى مظاهرها.. ولي في أزمة الكورونا هاذي عرات على ترمتها...وظهر المكشلف فيها حاشاكم وحاشى قدركم....

المهف هذا... ببغاء لأطروحات عملوها الصحاح الي خربو العالم...ومجرد بيدق في مجموعات ضغط...معروفة في أوروبا تضغط على السلط المنتخبة بانتظام... عن طريق الإعلام وفي كولوارات السلطة... باسم الخبرة والخبراء...ومراكز الدراسات مدفوعة الأجر من الشركات الكبرى باش تعمللها اللوبيينق... إلى تتحكم في الإقتصاد بالراس المال الكبير…

ماجاب شيئ جديد المهف هذا... لكنو يظهر جديد عنا في تونس بعد الثورة... خاطر وقت بن علي ماكانش عندو الحق يخرج للإعلام ويتكلم بحرية وينقد السلطة في خياراتها... وقتها المهف هذا كانو يبعثوه هو وغيرو.. يقابل تحت حس مس رئيس الحكومة محمد الغنوشي ووزرتو...لعقد الصفقات... إلى بعد تلقاوهم في قوانين وأوامر... ووصلو البلاد لثورة حرية وكرامة..

المهف من النوع هذا مستحيل تدخل في طاست مخو حوايج مثل شمعناه حاجيات اساسية ضرورية يلزم الدولة توفرها للشعب التونسي على مسؤوليتها...وشمعناه حياة كريمة... خاطرو متربي على عقلية حوت ياكل حوت وقليل الجهد يموت…

برشة اقتصادين ليبراليين بداو يفكرو ويراجعو في رواحهم وفي مواقفهم في أزمة الكورونا هاذي... ويقترحو في حلول اقتصادية اجتماعية أثناء الكورونا وبعدها... والببغاء الديسكو المكسر هذا بقا كيما هو...

المشكل موش فيه... راو عنا برشة من المشتلة هاذي..ظهرو كي الفقاع بعد ثورة حرية وكرامة.. وبرشة شدو وزارة وساهمو في تخريب اقتصاد البلاد وانتهاك الحقوق الإجتماعية... وفي تعميق الأزمة الاقتصادية الي وصلتها..

المشكل فلي عاملينلو كراسي في الإعلام... وفي كولوارات السلطة... ايعيطولو باش يسمعو رايو... يا والله أحوال..

و... #شدو_دياركم… وخوذو شهرياتكم كاملة..

Poster commentaire - أضف تعليقا

أي تعليق مسيء خارجا عن حدود الأخلاق ولا علاقة له بالمقال سيتم حذفه
Tout commentaire injurieux et sans rapport avec l'article sera supprimé.

Commentaires - تعليقات
Pas de commentaires - لا توجد تعليقات