استهداف رئيس الجمهورية.. جريمة كبيرة... وكل من يشرع في التحضير ليها... مجرم خطير.. ويلزم وضعو عند حدو قبل ما يمر للتنفيذ.. وحتى القانون يعتبر الأعمال التحضيرية استغراق للجريمة.. على خلاف بقية معظم الجرائم…
لكن... لكن... لكن…
شمعناه تتعمل نقطة إعلامية...بدون تقديم معطيات مادية وواقعية ...مثل فاش يتمثل المخطط بالضبط ... وكيفاش باش يتنفذ... وشكونهم الأشخاص والشبكة ... و شكونها الجهات الأجنبية الخ ...ياخي إعلام فاش هذا؟ فازة هاو ثمة جريمة كبيرة ... وهانا نبحثو فيها.. وما نعطيوش معلومات.... خاطرها أمور سرية ....توا هذا كلام؟
تي كي هي مازالت سرية... وربي يكون في عونكم باش تكشفو خيوطها.... علاش تكشفو عليها للإعلام؟ ياخي تفشلو في البحث.. ولاّ شنية حكايتكم؟ راهي ماهيش نقطة إعلامية... يهديكم يا أكارم ... وانتم قبل غيركم يعرف انو برشة باش يعتبروها ضحك على الذقون...
تي هو حتى لوكان تتعطي المعطيات المادية والواقعية ... القضاء وحدو هو إلي يقول ثمة أعمال تحضيرية لاقتراف الجريمة الخطيرة هاذي. .. ولاً ما ثماش.. وراهو هاك إلي وصلتلو معلومات. وبحث ولقى معطيات....هو باحث فقط...وموش القاضي إلي هو وحدو يكيف الأفعال....ويعلم الرأي العام..
فبحيث.... إنتي آش مدخلك؟
ماو قول رجعناكم لدولة البوليس وطاح الكف على ظلو… وزيد شمعناه استدعاء وسائل إعلام...وعدم تمكينهم من القيام بعملهم بتوجيه السؤالات والوصول للمعلومة... قال شنوة أمور سرية. موش كان يكفي فيديو يتبعث لوسائل الإعلام... وهي من بعد إلى تقرر انها أمور جدية....ولاّ لا؟
ملخر.... علاش نقطة إعلامية.. بدون تقديم معلومات؟
ولاّ يلزم نعملولها قاوق... ونحطو الإعلام في التركينة... في وضعية نفرضو فيها عليه يروج اللامعلومة... ويتعامل مع المواطن كرعية... بإعلام خشبي؟ الحق في الإعلام راهو من حقوق الإنسان... يا أكارم... وبحيث...تطلعش زادة الفازة كيف الفازات السابقة...إلي لتوا ما سمعناش عليها مآلات؟
ياخي ما خممتوش ان ألسنة السوء باش تقراها انو خاطر عنا دستور خطير على الحقوق والحريات...ويلزمو يمر... واستفتاء مزور في الآفاق.. خلي نعملو بوز بالفازة هاذي ... ونلهيو بيها الناس والإعلام...حتى يتعدى ال 25؟
ياخي انتم باش اتنجمو تمنعوهم من التفكير في هذا؟ ...بالكشي زادة استحوذتو على نورونات طاست أمخاخهم... كيما استحوذتو على كل السلط بإنقلاب؟ وقتها عاد يولي لعب ذري...خاطر زادة الناس لخرى مهفاة..... ونزيدو نكثرو من ضحك الشعوب والأمم علينا .
يا والله أحوال ها الإنقلاب... قداشو غفاص.