وقت المجلس الأعلى للقضاء ببعض الجمل البديهيات... خفاف نظاف...يخلي القيسون في التسلل الدستوري والحضاري.
عاد مبارح وكيف عادتو وعوايدو، استدعى السيد الرئيس قيادة السلطة القضائية المنتخبة طبق الدستور والقانون …برشة ينساوها الفازة هاذي انها سلطة منتخبة. .. والإخشيدي اولهم.
وكيف العادة السيد ما يفرحش بظيوفه. ولا حتى حكي معاهم في كنف الاحترام كيف ما تقول الأصول… وعمل خطبة متلفزة أمامهم…موجهة للحشد الشعبي الموش متربي…آنا في بقعتهم نقوم ونخليه يخطب لحوايجو… لكنهم قضاة متربيين ويحترمو النواميس… إلي هو ما احترمهاش معاهم… رغم انو رئيس دولة وماندراك… وهو إلي يلزم يعطي المثل في الإحترام للمؤسسات للمواطنين..
والخطاب هذا بش يبقى في التاريخ الأكحل متاع تونس..
السيد اعتبر فيه القضاة مجرد موظفين… وطبعا يحبهم يكونو موظفين عند سيادتو… كيف بن علي قبل… وياخذو من عندو التعليمات…وزادة تلقاه في بالو هو خليفة عمر الخطاب.. وهاذي كان لاحظتو يقول فيها ديما… آما بالدرڨة وما يتجرأش… كبيرة برشة عليه الفازة بش يبوح بيها… ويعنيها ديما ضمنيا.. يا والله أحوال .
ويحب كيف بن علي يكون عندو الحق يعطي للقضاة تعليماتو، وهذكا آش عمل في خطابه الخطير مبارح.. وهو فضيحة إخشيدية تاريخية بكل المقاييس..
السيد عامل فيها موش واعي ان القضاء أصبحت تحكمو سلطة مستقلة ومنتخبة بدستور الثورة…. منتخبة كيفو كيفهم….ولو بطرق مختلفة…
السيد ماشي في بالو انو وحدو منتخب… تقولش عليه موش قاري الدستور والقوانين المنظمة للسلط.
وماشي في بالو السيد…انو بورقيبة في زمانو…ببناتنا ماو؟ هذاكا ربي يرحمو على الأقل حط أسس وهياكل دولة.. إلي هو قاعد يحطم فيها كل يوم شوية… قالو بني قاعدي… علاش موش عشة.. ولاّ كيب بالطوب ومسقف بالقش… كيف وقت بكري.
وطبعا السيد يتعلل كيما عمل للمجلس النيابي إلي جمدو في عوض حلو… والدعوة لإنتخابات سابقة لأوانها طبق الدستور… يتعلل بالفساد الموجود في القضاء…و الفساد موجود في كل القطاعات…وبربي إلي يعرف قطاع ما فيهش فساد يقول منهو… وينورنا.
خاطر التعلل بالفساد اليوم… لتنفيذ أجندات شخصية… بدون محاربة الفساد من أساسه… واستغلاله لتصفية الحسابات مع الخصوم السياسيين…جريمة يعاقب عليها القانون… وغدوة لازم بش يتحاسبو الأشقياء إلي يقترفو فيها.. فلا يضيع حق وراءه طالب…
والكثير يعرفو ما قاله الدستور والقانون في الموضوع…وان التفعيل لمقاومة الفساد في القضاء موش ممكن يصير إلا بواسطة هياكل السلطة القضائية المنتخبة دونها سواها… وهذا بعد تمكينها من طرف السلطة التشريعية من الأدوات القانونية التي تطلبها السلطة القضائية … وتمكينها من طرف السلطة التنفيذية من الموارد البشرية والمادية اللازمة وكل الحكومات المتعاقبة كانت مقصرة في هذا المجال بما في ذلك قانون المالية التكميلي الذي اعدته حكومة الأمر الواقع للإخشيدي…. ما يعطيش الموارد ويشبرش.
ولكلنا نعرفو انو ما عناش حتى قطاع نظيف في تونس لان التشريعات الي تنظمها… والموروثة جلها عن النظام الزبوني متاع دولة الحزب الواحد هي الي تنظم الفساد…
و لكلنا يعرف ان توظيف القضاء وقت بن علي كان يصير باستعمال القضاة الفاسدين بالتعيين في المسؤوليات ومعاقبة القضاة النزهاء والنظاف الي يرفضو تعليمات القصر..
فبحيث… وخيكم عجبتو فازة المجلس الأعلى للقضاء مبارح…جو منعش لطيف.
بعد الخطاب المتلفز المتشنج الموجه للحشد الموش متربي، ولي يبين… لحد الآن….عجزو على تطويع معظم القضاة… لتوظيفهم للإنقلاب على الدستور… ولإرساء الحكم الفردي المطلق إلي يعني توظيف القضاء بالكامل… وما اينجم يكون وقتها وبطبيعتو كان قضاء فاسد… كيف في أي حكم فردي موجود اليوم في العالم،..ولي يلقى اليوم قضاء موش من أفسد ما ثمة في العالم بسبب الحكم الفردي… يتفضل ينورنا.
عاد بعد هذا الخطاب التاريخي… يهبطلو المجلس الأعلى للقضاء ببلاغ مقتضب برشة… ومتربي برشة شكلا… ولكن وفي الأصل ذكرو بالدستور التونسي… والقانون المؤسس للمجلس الأعلى للقضاء… وبأصول القانون الدستوري إلي يقراوها الطلبة في مادة القانون الدستوري في السنة أولى حقوق.
وبحيث… كان الإخشيدي استدعى قيادات السلطة القضائية مبارح…وعمل خطابو لتحضير الرأي العام لانقلاب آخر… وفي هذه المرة على السلطة القضائية بمرسوم غير دستوري … قبل الإعلان عليه يو 17 ديسمبر كما يروج له البعض….والله والإخشيدي أعلم وكان موش باش يفهم روحو بعد بيان المجلس… فأعلمو ان الإخشيدي قد وضع سيديجا ساقا في الهاوية….وجهنم…
وتعرفوش علاش؟
بسيطة… ما نتصورش ثمة برشة قضاة اليوم يقبلو يرجعو كيف ما كانو عليه وقت بن علي…. تحت طائلة النقل التعسفية إذا كان ما يطبقوش التعليمات ومكثرها قذرة….ولي تعتدي على كرامتهم كقضاة… وحقوقهم كمواطنين.. وتفرق عايلاتكم… وتعرقل تدرجهم المهني…
راهم حتى هوما زادة عرفو الحرية وحقوق وكرامة المواطنة بفضل الثورة..كيف كل المواطنين…علاوة على الواجب الدستوري لاحترام دورهم في المجتمع كقضاة من طرف جميع السلط..
وزيد تتذكرو إضراب القضاة عمناول؟
وزيد على الإخشيدي ان يتمعن جيدا في مواقف الهيئات الممثلة للقضاة… من قضية استقلال السلطة القضائية … وزيد عليه يتبين من مواقف جمعيات المجتمع المدني والأحزاب والفعاليات الديمقراطية المساندة باستقلال السلطة القضائية … قبل إنقلابه على السلطة القضائية.
السيد في بالو يلعب وحدو في الساحة… وقت هذا جبل بوحجرة كيف إلي عندنا في زرزونة المناضلة .
وبحيث… يا إخشيدي… يبطى شوية…
تلقاه يا جماعة ما يقراش.. ومعدل على جماعة الحشد في الفايسبوك يستلهم منهم… وقهوة وباكاو كريستال.
و قبيلة نحكيو عليه مع مجموعة من الزملاء…ياخي قلت عليه هذا تقولش عليه ………
أيا خلينا بالقدر… واحترام النواميس.