ثمة ناس متقلقين علاش ساعات نرجع نذكر بوقت بن علي وممارسات بن علي.. عاد آنا ما نحطهمش فرد شكارة... ثمة إلي عرفوها ممارساتو. .. وما عادش يحبو يتذكروها... عملتهم الجاير وقتها.... وما كانوش أحرار... و الثورة جابتلهم الحرية... وهاذم نعلمهم كانهم موش مطلعين على تجارب شعوب أخرى... الحرية ثروة غير قارة.... واتنجم تخسرها في كل لحظة... ويلزم اتدافع عليها يوميا...وما تسمعوش خرارف الكرونيكارات الجهلوت الي يروجو في العكس صباحا مساء ويوم الأحد....
وثمة إلي يشجعو اليوم في الإنقلاب والإعتداء على الشرعية الدستورية ودولة القانون والمؤسسات وفي انتهاك الحريات المضمونة بالدستور...وعاشو استبداد بن علي...وبالطبيعة باش يتقلقو سيادتهم من التذكير بيه....خصوصا من وجه الشبه معاه... المجراب تهمزو مرافقو. وثمة بالطبيعة الثقفوت النظروت لعبيريرة بن علي... وهاذم نوعين....
إلي كانو مع الاستبداد او يتمعشو منو وعملو مساحيق ديمقراطية في تنظيراتهم بعد الثورة...ولوكان تشد العبيريرة السلطة تو تعاودو تكتشفو وحشيتهم.
وثمة إلي عندهم الشيخ ومن معه العدو الوحيد في حياتهم... كيفهم كيف العبيريرة... مولات الحزب المأهل اكثر من غيرو في الصنداجات باش ينتصر عليه.... وهاذم مستعدين يعاونو حتى ابليس ضد الشيخ.
عاد انذكرهم الناس هاذم لكل.... انو العدالة الانتقالية راهم الجماعة إلي حكمو بعد الثورة... بوزوها وشلكوها...في إطار صراعم على السلطة...وخصوصا جماعة النداء إلي جزء منهم مشمول بيها... والنهضة إلي خدمت بيها في إطار صراعها معاهم للاستحواذ على مفاصل الدولة... والنقابات الأمنية الي تبعثت ضد الإستبداد ومن أجل أمن جمهوري وتحول العديد منها لماكينات لتأبيده... فبحيث... وقت بعد ثورة حرية وكرامة... لا تكون تكشفت حقيقة الإستبداد لأجيال ما بعد الثورة والمقبلة....
ولا المستبدين اعترفو بجرائمهم... ولا تحاسبو... ولا طلبو السماح من ضحاياهم ومن المجتمع ...وجزء كبير من ازلام الاستبداد إلي من المفروض تشملهم العدالة الإنتقالية تلقاهم في كل مكان من مفاصل الدولة والأحزاب والإعلام إلخ... وحتى في مراكز حساسة عندها علاقة يومية بحماية الحقوق والحريات…
عاد المجتمع وقتها ما يكونش تحصن ضد رجوع الإستبداد.. وما فيها بأس كان الواحد يذكر...ويزيد يذكر... فالذكرى تنفع المؤمنين بالحرية والديمقراطية...لخرين ما يحبوش كشف العورات.
وما تستغربوش اليوم.. أنو عبيريرة بن علي إلى كانت من هؤلاء المستبدين.. يكون حزبها لول في الصنداج... وما تستغربوش انو جزء مهم من الشعب يصفق لانقلاب على الدستور بعد ما دخلت قيادة النهضة البلاد في حيط.... وما تستغربوش انهم يشجعو بكل وقاحة في الإعتداء على الحريات...ويطالبو الحاكم بأمرو... باستعمال الأمن والجيش...لإنتهاك الدستور، والمكاسب الديمقراطية ،ودولة القانون ،والمؤسسات..
موش كيف ما كان يعمل المرحوم بن علي...ولاّ لا؟ عاد إذا كان بن علي هرب للسعودية... بن عليات السياسة هانهم برشة في القيادة اليوم... ولاّ ما في بالكمش؟