قلية المُستعمَر : كيفنك من برة... شنوا أحوالك من داخل

وابكي على حقوق المواطنة للشعب الذي يريد.. عملت دورة البارح في جرزونة المناضلة .. ياخي نلقى في مرشي حومتي الأصلية حي العمال صديق طفولة عندي سنين الله ما شفتوش..السيد حالل حانوت حرفة منذ قرابة 40 سنة.. عاد ما نحكيلكمش على الحالة التعيسة للمرشي...كياسات مكسرة... وجزء منها تراب جملة ... زبلة في كل مكان... روائح كريهة...تقولش عليك يندرا وين... وموش في مرشي... ما لقيتش التوصيف..

ياخي قتلو شنوا هذا؟ .. وشبيكم ساكتين؟ قالي حتى إنتي يا أنور احنا ساكتين؟ تي من بكري وحنا نحاحيو....وهو هكاكا وكل عام يزيد... تي وقت كانت ثمة شعبة خذات من عند كل واحد منا 100 دينار باش تصلح...الجماعة بلعو الفلوس وهوكا لتوا هكاكا.. وكل عام يزيد على ما بيه... وتفكرنا عاد كيف كنا صغار... كيفاش كان المرشي بعد ما خرجو الفرانسيس... وكيفاش كان حي العمال بجرزونة المناضلة وقت جينا سكنا فيه... دنيا أخرى..

عاد كي روحت وحليت الفايسبوك... نلقى تصاور.... وتنبير التوانسة.. على كيفاش تنظفت وتزينت الطرقات في العاصمة منين باش يمرو ضيوف لحكومة الكرام ... تقولش عليها زرابي...في جنة على وجه لرض... وباقي الطرقات والأحياء المحيطة بيها... قاعدة كي حليمة على عاداتها القديمة…

كيفنك من برة... شنوا حوالك من داخل … وزيد قالو باش تتسكر على الشعب الذي يريد... و تكون حكر على الضيوف الكرام ..... عطاوهالهم كرية على وجه الفضل بنهارين...بلاش فلوس. مازالو كان ما قالوش ماهيش من مقام الشعب الذي يريد .

ما نخبيش عليكم... عشت شخصيا في فرانسا.. وما شفتش كل ها الخنار... وقت يجيوهم ضيوف أجانب... حالة النظافة هي هي... وما يسكروش الطرقات الرئيسية على المتساكنين مدة يومين.. ومصالح وتنقلات الشعب الفرانساوي الذي يريد ما تتضرش... وحتى لو يحصل ان تتعطل أحيانا بعض الطرقات.. فلفترات قصيرة..وفي مناطق صغيرة ومحددة... وموش في الطرقات الرئيسية والناس ملوحة... تلوج منين تتعدى وكيفاش...

عاد قلت بيني وبين نفسي... حتى وقت ما ثماش سكر وقهوة وبنزين والخبز بالصف الخ... جماعة الإنقلاب يلقاولها فلوس... تلقاهم خايفين على عيون الضيوف. وموش مشكل مع الشعب الذي يريد... ولفناه ياكل وتتنظف وتتزين بلادو... وتتحل قدامو الطرقات... وحتى باب العرش كان لزم... بالكلام الفارغ....والبش....و الوعود الكاذبة.. والحديث الشعبوي.

وهذا راهو قلة احترام كبير... وموش احترام بالكل... واعتداء على كرامة التونسي... وحقو في التنقل... واستهتار بمصالحو... وبراحة الشعب الذي يريد... كان موش تنكيل بيه كيف ما يقول لاخر. تي قولو يا دين أمي رجعنا بيكم لوضع الرعية... لما وراء الوراء... وكول ولا طير ڨرنك... وطاح الكف على ظلو... قالك جمهورية جديدة وكذا.

آه حقة موش ما ننساش... ما يغركمش التبهبير بالسيادة الوهمية .. هذكا راهو تفشليم صبياني.... وكلام شعبوي مضروب... للإيهام بخلاف ما يقومو به من ممارسات وأفعال.. وما يتخذوه من مواقف فعليه مع الغرب ... متناقضة مع كلامهم الشعبوي . تي هوما حتى الاستعمار قالو حماية... بربي كيفاش باش يفهمو انهم من عقلية المُستعمَر لتوا ما خرجوش؟

وتحبو تفهموهم آش يفكرو بالحق ها الشعبويين ؟ ساهل ماهل راهو.... اسمعوهم جيدا آش يقولو... واعتبرو انهم مقتنعين بعكس ما يقولو.. وهذكا إلي يعملو ديما فيه ... وهذا ثابت منذ الإنقلاب...بداية بأضحوكة تطبيق الفصل 80.

وطبعا هذا موش مستعدين يفهموه إلي حبرو صبعهم.. وما زالو شادين صحيح فلي عملوه ...ولاّ حصلو فيها وموش عارفين كيفاش يتراجعون.

الحاصيلو.. ربي يفرج عليهم وبرة... ويعطيهم على الأقل راحة نفسية حتى لوكان موش باش يتحل عليهم باب العرش متاع القيسون ... كيف ما زالو يتخيلون ويندعون.

Poster commentaire - أضف تعليقا

أي تعليق مسيء خارجا عن حدود الأخلاق ولا علاقة له بالمقال سيتم حذفه
Tout commentaire injurieux et sans rapport avec l'article sera supprimé.

Commentaires - تعليقات
Pas de commentaires - لا توجد تعليقات