إيجاو بربي نذكركم ونحكيلكم على خرافة تعرفوها.. أيا سيدي بن سيدي... هوكا ثمة ملهم عظيم يحكم في بلاد في كوكب المربخ...ويحب يحكم كان وحدو.. ياخي ما عجبوش كيفاش ثمة مجلس قضاء منتخب و مستقل عليه .. يوخر ويقدم ويمشي ينحيه. ويعين مكتب في بقعتو... هو يجي منو ما يكونوش متوظفين عندو... وتتقسم الدولة المتمثلة فيه؟
وفي الجرة يعزل عشرات القضاة ملي كانو في المجلس القديم .. وملي متمسكين بيه وفي بالهم هوما قضاة وموش موظفين ... وللتبرير اندعاو معاونيه... أنهم فاسدين ومجرمين وعندهم ملفات وشكايات ضدهم ... ويسكرلهم بيرواتهم بالبوليس...ويقطع ليهم أرزاق أولادهم .. وطبعا الرعية تصفق وتقول أضرب واحنا معاك عاد الجماعة لشكون باش يشكيو؟
طبعا بما انهم ماركة دولة قانون ومؤسسات.. مشاو يشكيو للمحكمة.. والمحكمة بما أنها محكمة... وموش ماركة أضرب واحنا معاك. طالبت بالملفات.. يجيش بربي ترفض الشكايات من غير ما تثبت؟
وقعدت تستنى... وتستنى.. وتستنى... وتستنى.. تي الحاصيلو طلعت الحكاية مافيش... ما ثماش ملفات... نيات.. والو.. ماركة تبطى شوية الملفات. عاد المحكمة... وديما بما أنها محكمة ... طبقت القانون.. وقالت بما ان العزل ماعندوش سبب قانوني .. نأذن برجوعهم حالا لعملهم... تقولو أنتم رجعو؟.... زادة يبطى شوية.. ياخي ثمة محكمة هي قدام مشيئة وقرار الحاكم الفردي؟
وهوكا لليوم شادد صحيح... قالو محكمة وكذا وإيقاف تنفيذ؟
عاد راكم تقولو علاش ذكرت بالخرافة هاذي متاع دولة المريخ.. خاطرني يا أكارم قاعد نشوف في خرافة أخرى تشبهلها... قاعدة تصير في نفس دولة المريخ.
ثمة جماعة هابطين على ريوسهم... في بالهم عاملين حملات انتخابية للمترشح الفلاني.. او للمترشح العلاني..لخلع الحاكم الفردي والحلول محلو. والله هكة كيف ما نحكيلكم ... يحبو ينحيولو جملة الكرسي المتسمر فيه...يا بوقلب. الجماعة محضرين حصايرهم... قبل الجامع . وهانهم يدللو بيها... في سوق انتخابات موش موجود.
ولي هذا يندعي للجمهور انو حصيرتو احسن حصيرة تليق بالجامع والمصلين إلي فيه. والحاكم الفردي مسكر بيبان الجامع.. ومتربع فيه وحدو... وحولو كمشة رعية قليلة يخطب عليهم... والمصلين بعد ما حطوه إمام عليهم ..قال شنوا هو نظيف ... ما عادش يحبو يصليو وراه. والغريب انو الجماعة جاد عليهم إلي باش تصير انتخابات كيف ما هوما يحبوها تصير ..
نساو فيسع وش عمل قبل في سلطة قضائية. .. ومتناسيين انو عمل نفس الشيئ في الإنتخابات والسلطة المشرفة عليها.. كيف ما عمل قبل في القضاء.... بل وأكثر… نساو انو نحى هيئة الإنتخابات المستقلة... وعوضها بهيئة اختار أعضاءها هو... وعينهم فيها... ولي يخرج منها عن الصراط المستقيم.. يتطرد بالبوليس كيف ما صار للقضاة قبل... صارت لعضو من هيئة الإنتخابات هو عينو ... ياخي طلعلو مشاكس.
وأكثر من هكة...عمل مرسوم... سيف مسلول ضد من يتجرأ على التعبير خارج الصراط المستقيم.. وطبعا استغلتو الهيئة باش تسكت العضو المطرود...وهوكا راصاتلو يتنقل بين المحاكم... يجري ببناتها من جلسة لجلسة ثماش ما يخليووه في حالة سراح مؤقت... لا يحرموه في الصيف من بحر سلقطة العظيمة متاع دولة المريخ. وحتى ثمة عضو في هيئة قديمة... ما فلتتوش رغم انو ما يحكيش برشة.... جيست كلمة او كلمتين كل مرة... لانها زادة وجعتها كليماتو... . وراصاتلو كيف صاحبو .
وهذا تعرفو شمعناه؟
معناه ردو بالكم من توا...لا تشككو في النتائج إلي تعلن عليها الهيئة وتتهموها بالتزوير...وقتها دار خالتكم أولى بيكم... لمدة تنجم توصل لعشرة سنين..مالا هو ساهل اللعب بعشانا. وأكثر من هكة... إلي يخرج اسمو في الصنداج كمنافس ولو بعيد... إما سيديجا موجود في دار خالتو.. او عندو دوسي على الأقل يستنى باش يدوره ليها بيه عند الحاجة .. وإذا كان موش ممكن بتهمة فساد.. موش مشكل ... بتهمة حرية تعبير.
وأكثر من هكة... نحى دستور البلاد... وعمل دستور منو وإليه...وضيق فيه شروط الترشح... مثلا منع كل مواطن من دولة المريخ ... إلي عندو جنسية ثانية من حق الترشح .. وهو حق طبيعي من حقوق الإنسان.. حتى لوكان يكون عندو جنسيات كل دول كوكب المريخ . وهذا حتى لوكان تكون جنسيتو الثانية خاوة... وثمة برشة منهم هكة في دولة المريخ ...يعني تهمة ضمنية بقرينة ضمنية...متاع عمالة للخاوة.
إيه.. إيه ... نعم... قلت خاوة... باش نسحب البساط من تحت ساقين الثقفوت الشعبووت متاع راس لمبوط... إلي عندهم مشكلة مع المهاجرين في العكري وطلبو الجنسية من اجل المساواة في الحقوق مع مواطني العكري ... يحبوهم يبقاو مضطهدين... ناقصين حقوق مشروعة تحصلو عليها بعرق جبينهم... ويبقاو عرضة للترحيل من طرف العكريين العنصريين... وقت يقررو ينكلو بيهم.
وزيد قلة معروف ونكران جميل وقلة حياء .. ياكلو في الغلة ويسبو في الملة ... عاملين فيها ما يعرفوش ان هؤلاء يزققو فيهم... وقت يبعثولهم العملة الصعبة كل عام بالكبير ... ويعاونو في دولة المريخ باش تشري ليهم القمح والسكر والروز من الخارج باش يوكلو... طبعا هذا كان لقاو صفوف. ومن الشروط يلزم يكون المترشح موش كان جنسيتو متاع دولة المريخ ... يلزم زادة بوه وجدو وامو ...قاللكم انتم يا مواطني دولة المريخ... معايا نا ما كمش متساويين في الحق الانتخابي. إلي امو جنسيتها أجنبية... من العكري مثلا... او حتى خاوة.. ما عندوش حق الترشح ...
وزيد هذا الشرط معروف انو صعيب على برشة باش يثبتوه بالحجج الرسمية...خاطر موش كل الأجداد عندهم ثبوت جنسية .. الخ.. ويبقى طبعا التساؤل الكبير ... إلي ها المترشحين عاملين فيها مطفيين الضوء عليه: توا كي واحد يحب يترشح وهو عملولو ملف في محكمة... وإلا يعملولو ملف من بعد... ولو انو موش موجود في دار خالتو... زعمة الهيئة المعينة تقبل ترشحو؟
وما تقولوليش يلزم حكم بات وكذا وتبداو تنظرولي في القانون. تي هوما القضاة وما عندهمش ملف أصلا... وتعزلو... ورغم ان المحكمة رجعتهم... وهوكا ما زالو معزولين... خلي عاد كان تحب تنحي الكرسي لمولى الكرسي في دولة المريخ. قالو قانون وكذا… ما عناش هذا في دولة المريخ.
تي تكفي شهادة من إيكس إيكس.. باش تلقى روحك في دار خالتك... شايخ بالبنغلاص صباحا مساء ويوم الأحد . وأكثر من هكة... تي حتى إلي يحكي منهم مع غيرو... في مستقبل بلاد المريخ... هذاكا معتبر المخطر الخطير على دولة المريخ ... ودوسي تآمر على أمن دولة المريخ يستنى فيه...المستقبل راهو تعمل سيديجا... انتهى التاريخ و يوفا الحديث. وزيد موش كان لدولة المريخ.. لكل كوكب المريخ .
وهوكا ثمة سيديجا جماعة عندهم عام في دار خالتهم... شايخين بالبنغلاس صباحا مساء ويوم الأحد.. وهو ساهل تشكك في شرعية ومشروعية مولى دولة المريخ. وأكثر من هكة.. ما ثماش ناخبين ...أصلا.
ما عادش عندهم ثقة في الصندوق... بعد ما فسر ليهم الملهم العظيم انو هوما لكل... وبالنظافة باش تتحسن أمورهم ويخدمو ويعملو مستقبل ... جدت عليهم الوعود... وعطاووه ثقتهم بالملايين. حتى إلي ما صوتش قبل مشى صوت... ياخي صارتلو طريحة التوبة.
وهانهم راصاتلهم شادين الصفوف ثماش ما يخلطو على كيلو سكر وسميد وباكو حليب كان عندهم فلوس... وهذا كان ما حرقوش..... وحاكم دولة المريخ زاد سكر عليهم الحدود مليح... ولي نجحت حرقتو... يرجعو... لا وكلو لا خلاه ياكل في بلاد أخرى يعني قاتلك قاتلك... بربي ثماش أكثر من هكة تجويع وتنكيل. والجماعة ما زالو عاملين حملات... ثماش ما يقسمو معاه... عشر الناخبين المتبقيين.
وأكثر من هكة...هو يقوللهم ما نسلمش الأمانة لناس موش وطنيين... وينظر ويفهم فيهم كل يوم... ان الوطنية تقتصر عليه...والباقي خونة وعملاء فاسدين... وهوما يقولو أنهم مترشحين. جاب ربي عاشو قبل تحت زوز حكام فرديين شدو صحيح في الكرسي مدى الحياة... كيف كل الحكام الفرديين... ولول ما تنحى كان بانقلاب... والثاني هرب بعد بديقاج.
وعلى فكرة... إلي يلقالي حاكم فردي في العالم.. ما شدش في الكرسي مدى الحياة... بربي يجيبهولي. مالا ساهل هو يسلم في الكرسي بعد ما تعب عليه. تي الحاصيلو... بلحرام حتى لوكان الخرافة تولي واقع... ويربح منافس ضدو... وهذا مستحيل على الدزة هاذي...لاما يطردو بالبوليس كيف ما عمل قبل مع عضو هيئتو للانتخابات ... ويعملو أمر بنومرو يندرا قداش ويعزلو بيه .. كيف ما عمل قبل مع القضاة.
مالا نلعبو احنا في دولة المريخ.
فبحيث... على الدزة هاذي في دولة المريخ... ياخي ممكن اتتخابات حرة ونزيهة وشفافة؟ عاد في عوض يلمو حصايرهم.... ويتلمو باش يحلو الجامع.. ثماش ما تولي الناس لكل تدخل.... وثماش ما يرجعو المصلين ... باقيين يعملو في حملة لحصايرهم. بربي ياخي هاذم سافا؟ ما يعرفوش انو على الدزة هاذي... قاعدين يرفسو في مندرة لا فيها لا قمح ولا شعير؟
والمضحك انهم الشيئ الوحيد إلي ربحوه وهوما إلي هذا يقول حصيرتي خير ... أنهم من غير ما يشعرون هابطين بفركة وعود حطب... على بعضهم تشيش وريش. وعاد هاك الزقفونيين متاع دولة المربخ.. وكرونيكاراتهم بمستواهم العالي والشاهق برشة في اللغة والتفكير العميق ...عطاهم الوقت ودبروها....ولقاو فاش يحكيو.
هانو يتفرجو فيهم... وينبرو... وكيخ كيخ... شايخين عليهم.