التلفزة الوطنية الحكومية... تونس 7 المتجددة.. عاملة ومضة إشهارية على "الإصلاح السياسي"... مسايرة للإنقلاب على الدستور...ولترضية الحاكم بأمره…
الجماعة تلقاهم خايفين لا المنقلب يعزلهم ويلقاو أساميهم مقالة في الرائد الرسمي عن حين غرة...في إطار سياسة قطع الأرزاق الي يخدم بيها الإنقلابي منذ الإنقلاب... باش يتحكم في أفكار الناس ويفرض عليهم موالاتهم لمشروعه التخريبي للدولة.
وهاذي راهي قانونيا ما هيش إشهار مدفوع الأجر... بل استعمال إجرامي لموارد الدولة للمنفعة الشخصية للحاكم بأمره لفائدة مشروعه السياسي الشخصي... وينطبق عليها الفصل 96 من المجلة الجنائية... كما انطبق على من كانو قبله…
عاد أقل ما يقال عنها الومضة ...أنو محتواها هولامي...ما تفهم منها والو.. الجملة تتناقض مع إلي بعدها.. فيما يتعلق بمبادئ وأصول القانون الدستوري.
لكن تفهم انو الهدف الوحيد منها.. بروباڨندا لترسيخ الفكرة لدى الجمهور انو مشكلتنا تكمن في الدستور... وضمنيا يلزم نساهمو في انقلاب المنقلب عليه .
لكن الجماعة المساكن إلي عملوها ضاعو فيها بازڨة... بين أبجديات القانون الدستوري إلي يقراوها الطلبة في السنة أولى حقوق... ورغبات المنقلب على الدستور إلي عفس بالجزمة على تلك الأبجديات .
يا والله أحوال... وقت الإعلامي تكون مشكلتو إرضاء الحاكم الفردي... يخسر قيمتو المهنية... وحتى كرامتو المواطنية…