في البلدان الديمقراطية يمكن المطالبة بتزكيات وما شابه في الانتخابات الرئاسية... لأنها تتعلق بالوظيفة العليا في الدولة... وهي استثناء لمبدا أساسي.. هو حرية الترشح لكل مواطن للمشاركة في إدارة الشأن العام بدون قيود.... وهذا الإستثناء...يأكد المبدأ... وهو غياب التزكية في الانتخابات التشريعية والجهوية والمحلية.. ما ثماش تزكيات فيها في الأنظمة الديمقراطية.
عاد في 1989.. بن علي كلي عمل انتخابات تشريعية تعددية... وكان التصويت على القائمات.. و القايمة إلي تجيب اكثر أصوات تهز لكل.. كيف في لعبة الكارتة إلي تتسمى اللص يهز لكل. وطبعا بما انو هو اللص... التجمع هز لكل. والأحزاب المرخص ليها... والمواطنين ينجمو يقدمو قايمات في كل ولاية..
عاد بن علي الخبيث... المختص في الاستعلامات...وكان يخطط باش يقصي الجميع ويفرض نظام استبدادي أتعس من نظام بورقيبة..... بعد ما يركز أمورو... حتى شرط خبيث. وهو انو على كل مترشح في قايمة.. يلزمو يجيب تزكية 65 ناخب في وثيقة معرف عليها بالإمضاء في البلدية... يعني مثلا كي حزب يحب يقدم قايمة في دايرة فيها 5 نواب.. يلزمو 325 مزكي…
ياخي الأحزاب إلي قدمت قايمات... هبطت لكل على ريوسها.. بمن فيها النهضة إلي تقدمو مرشحوها تحت يافطة قائمات مستقلة واللون البنفسجي.. الجماعة لكل عيطو لأعضاءهم ومناصريهم وأصدقاءهم وعايلاتهم...وحتى على ريحة الريحة... باش يبصمولهم في التزكيات في البلديات.. ياخي طلعو صبو على أرواحهم للبوليس السياسي. وسهلو عليه الخدمة... وكلاساهم كل واحد في حانوت معارض..إلي يقلك عندو تصحاحاتهم الرسمية.
وطبعا كان ذلك... للفرز الأمني في كل هياكل الدولة والشركات العمومية الخ ... وحتى في تسليم جوازات السفر... كيف توة بدى فيها القيسون. راهو مسؤول قديم في رابطة حقوق الإنسان... مطلع على الملفات.. يحكي معاكم.
لكن إلي فاتكم أوحش وانذل... هاذوكم الآلاف من المواطنين... إلي زكاو القائمات المستقلة لحركة النهضة...وفيهم الكثير زكاو باستحباب... خاطرو نصير وموش في التنظيم... أو المترشح جارو او زميلو في العمل أو يكون منو.. الخ...ومشى في بالهم كيف ما جاء في بيان سبعة نوفمبر الكاذب متاع بن علي.... انو لا ظلم بعد اليوم ... لكلها تصنفت نهضة من البوليس السياسي ... ودخلت في ماكينة الاستئصال الوحشية لبن علي…
وتوقفو برشة... وتعذبو... وتعلقو.. و تقطعت أرزاقهم... وتجوعت عايلاتهم... وتحكم عليهم بسنوات سجن.. وبعد السجن بسنوات مراقبة إدارية... يمشيو يصححو في دفتر في المركز... وما يقوموش الصباح يخرجو يخدمو على عايلاتهم..
و شخصيا رافعت على العشرات من هؤلاء... اعتبرهم البوليس السياسي إلي وقفهم وعذبهم.. محتفظين بحزب سياسي غير مرخص فيه... وبعد 1994 وتنقيح القانون... أعضاء في عصابة مفسدين... والمحاكم تحكم عليهم بسنوات سجن... وتعتبر التزكية قرينة على الانتماء لحركة النهضة…
والأحكام هاذي موجودة بالآلاف في الخزينة في مختلف محاكم الجمهورية...وفي أرشيف هيئة العدالة الانتقالية... وياخي موش القيسون الملهم العظيم... واكب الفترة هاذيكا من تاريخ تونس؟ ياخي علاش يرجع فيها التزكية في التشريعية.. وقت هي تنحات بعد الثورة من القانون الانتخابي ؟
عاد احنا توا دخلنا في ديمقراطية نوع ليكس... نوع بوليسي.. موش موجودة في العالم أجمع... وقت نندعيو الديمقراطية ... بالإقامات الجبرية خارج نطاق القصَاء... ومنع من السفر بالبوليس بدون إذن قضائي... . وعزل قضاة وطردهم من المحاكم بالبوليس...وغلق هيئات دستورية بالبوليس.... إلخ... وهاذي راهي المفتحات... أما الكسكسي بالڨديد ما زال يطيب ...هوكا تلقاووه موجود في دستور القيسون.
عاد تحبو تسمعو نكتة اليوم؟
هاظاكا المنصري المنصب على هيئة الانتخابات لتزوير الإنتخابات... قالك المنقلب على الدستور في مشروع المرسوم الإنتخابي إلي عرضو على الهيئة قبل نشرو ...كان فيه شرط 200 تزكية فقط.... ياخي جماعة الهيئة المنصبة قالو شوية.... واقترحو عليه يدوبلها... ويردها 400... ياخي خذى بخاطرهم. فبحيث.....إنتم امشيو زكيو.... عاد… وانا هاني نتفرج وانبر…
وانشالله ما يجيش نهار وتراصي لخوكم ... يعمل روبولوت وقتها بالحق يتعاود التاريخ في شكل مهزلة.. وبحيث... راني مازالت ما حكيتش على الفساد الإنتخابي المرتقب ..بداية بشراء التزكيات...الخ …وكيفاش باش يولي الفساد في الانتخابات السابقة قدامو... عمشة في دار العميان…
وقتها يظهرلي باش تبلاح العشرية السوداء.. وتعطي على الڨري... كان موش الڨري الفاتح.