نحكي راني بموضوعية...ونتذكر المجلس النيابي لبن علي.. كان على الأقل فيه سياسيين...ويفهمو في القانون...ونعرف منهم برشة...بحكم مهنتي كمحام... كانو لا محالة معينين فيه من بن علي .. رئيس الحزب الحاكم الفاتق الناطق...وكانو منتخبين بتزوير الإرادة الشعبية...في انتخابات غير نزيهة وغير شفافة وغير حرة وبدون تعددية فعلية...وبالطبيعة كانو بني ويويست... ومناشدين لبن علي.. .
لكنهم كانو سياسيين من قيادات التجمع في الجهات...ويعرفو القانون...ويعرفو يحكيو وتدوير اللغة الخشبية.... ولي ما عندوش تجربة منهم...كانو يقريووه بمدرسة إطارات التجمع... وين يتعلم يحكي وما يزلطهاش...هههه
عاد اليوم في افتتاح جلسات المجلس الصوري للبني القاعدي...هاظاكا بو حداش فاصل من ميا مشاركة شعبية ...وهي نسبة متاع تطييح قدر...ههه...واول مرة تحصل في تاريخ تونس المعاصر…
ولوكان جات ثمة شوية كرامة سياسية وموش لهث على الكرسي... راهي ألغيت الانتخابات الصورية هاذي وما ترتبت عنها...حتى لا تغتال السيادة الشعبية في انتخابات لا عندها شرعية ولا مشروعية ..كيف ما طالبت بيه القوى الحية في المجتمع بين الدورتين الانتخابيتين الصوريتين…
عاد في جلستو الأولى.. المنقلبون على دستور الثورة...منعو الصحافة التونسية والأجنبية من دخول المجلس والقيام بواجبهم في إعلام المواطنين...بحرية... وكلفو تونس 7 / 25...بالقيام بنقل خشبي على الطريقة الإخشيدية الشمولية للعلو الشاهق للحدث "التاريخي"...ولي باش يتحاسب عليه نهار آخر...كل انقلابي على دستور الثورة شارك فيه...ههه..
وهذا راهو اعتداء سافر على حق المواطنين في الإعلام....وهو حق من حقوق الإنسان... وزادة راهو اعتداء على الصحفيين بمنعهم من العمل...وهو جريمة في القانون اسمها تعطيل حرية الخدمة...ههه … ولوكان جيت صحافي نسجل شكاية عند النيابة...لن تسقط بمرور الزمن إلا بعد ثلاثة سنوات...ولازم باش يقع البحث فيها وقت يجي واقف آخر ...وما عادش هاظاكا متاع اليوم…
برشة ينساو اننا في فترة انتقال ديمقراطي...وما اتدوم فيها لحد...هههه … وهاذي راهي سابقة في تاريخ المجلس...حسب ما نتذكر...ومن وقت بورقيبة... وحتى وقت بن علي...وما نيش نحكي كان على ما بعد الثورة...هههه …
عاد زعمة علاش ما خلاوش الصحفيين يخدمو على أرواحهم؟
طبعا خاطر فكرهم شمولي...ويعني خشبي في ما يتعلق بالإعلام....وينتهكون حقوق الإنسان في كل وقت وفي كل مجال...خاطر هاذيكا طبيعتهم.... لكن أيضا... يظهرلي الجماعة قامو الصباح خايفين من الفضايح....الناس تقول صباح الخير....وهوما يقولو برا روح...ههه…
تلقاهم خايفين من الاستجوابات للنواب الصوريين للعلو الشاهق الي باش يطلبوها الصحفيين... والكلامات الراقية إلي باش يتداولوها ببن بعضهم وياخذوها الصحفيين على الطاير...والتكمبينات إلي باش تصير في الكولوارات... وباش تكون حامية الوطيس على توزيع السترابنتانات في المسؤوليات في المجلس الصوري ولي توفر الوجاهة والإكراميات والسفرات والدولاب...الخ…
خايفين لا يوثقوها الصحفيين كيف ما كانو ياخذوها على الطاير في المجلس المنقلب عليه..وبعضهم كان يعمل بيها في البوز..هههه… فبحيث ..يظهرلي الجماعة صبحو يطرطرو..هههه…
وهذا من الفضايح...إلي باش تتكشف مرة أخرى...بعد الحملة الإنتخابية الأضحوكة للمترشحين للمجلس الصوري...المدافعين على العلو الشاهق... خايفين من التجلطيم...لا يقومو ينظرو كيف ما عملو في الحملة الإنتخابية... على صلاحياتهم البني ويويست...بدون حتى قراءة الصلاحيات غير المخولة ليهم في دستور المنقلب على دستور الثورة...وفهمها....هههه...وتتسجل الفازات المضحكة...بتلافز تونس والعالم...وتتروج الفضايح في وسائل التواصل...هههه …
يا والله أحوال.. هههه
ومانيش نحكي طبعا علي منهم مدورها ذبان...ومساهم في الحملات القذرة ضد حقوق الإنسان....ويقوم يوميا بخرق القوانين ضد مواطنين اخرين مختلفين سياسيا معاهم..لأنهم يلزمهم يعملو البني ويويزم للعلو الشاهق...بمنطق الدنيا مع الواقف...ومنهم من كانو مع إلي كانو واقفين قبلو...أو مع بعضهم... هاظوكم اللمبن..لا يتحكى معاهم...ولا عليهم...هههه …
فبحيث....يظهرلي الحكاية... لا يتقال انو المجلس هذا بو حداش فاصل حطم الرقم القياسي في نوعية العلو الشاهق...أكثر ملي سبقوه... حتى مجلس بن علي...هههه …