برشة ما يحشموش... يشتمو ويسبو في نجيب الشابي... نجيب الشابي سياسي ديمقراطي...وأثبت ذلك بالنضال السياسي والإعلامي والميداني من وقت بورقيبة.. ولليوم…
عاد سيدي خويا، للة اختي... تتفق معاه او تختلف معاه في الرأي والموقف السياسي... وكيف حاليا في دعوتو لتكوين جبهة انقاذ...مع من يريده وبالتصور الذي يريده... هذا رأي وموقف سياسي هو حر فيه... وكل واحد حر تجاهه وعندو الحق ينظر لفايدتو... او ضدو... وكي يحب حتى صباحا مساء... وحتى يوم الأحد…
لكن انك تتهجم على شخصو.. واعتبارو.. وتفتري عليه... آنا نقلك هذكا مستواك... متاع سب وشتم وكلام مستنقعات.. خاطر نجيب شخصية ديمقراطية... و الديمقراطيين ما همش دجاج ماكينة...كيف ما إنتي متعود عليه.
هوما يختلفو في الآراء والمواقف في كنف الاحترام المتبادل.. خاطرهم ديمقراطيين...وموش متعودين كيفك إما بالفارينة او بالسب والشتم . وهاني موش باش نقلك من انت... وشنوا السيفي متاعك في النضال من أجل الحريات والديمقراطية .. خاطر عادة إلي يطيح للمستنقع الذباني هذا... ما عندوش.
خاطر وقت هو يحاول يناضل مع غيرو ضد الإستبداد الزاحف... ضد انقلاب شعبوي... لتأسيس حكم فردي مطلق...يجزر الناس لكل ومنهم انتي... انتي إما قاعد تتفرج... إما عامل فيها انها عركة بين النهضة و المنقلب...إما منبطح تستنى وين ماشية الأمور باش تركب في الفڨونة لخرة .... إما ساندت الإنقلاب وتوا رجعلك شاهد العقل لكن باقي تتفرج ..ولكلو في قالب بعضو الحاج موسى وموسى الحاج.
فبحيث... انتي غير مأهل باش تعطي الدروس لنجيب... وغيرو ملي يواجهو في الحكم الفردي ومزيد تدهور حالة البلاد من جرة الإنقلاب .... خاطرو هو على الأقل قاعد يحاول... وانتي تتهجم عليه بش تغطي على فضيحكتك.... بما انك مطبع مع الإنقلاب والإستبداد الزاحف…
وبحيث.... المواقف هاذم رانا شفنا منها برشة قبل الثورة.... ونهار 25.. اكتشفنا ان اصحابها ثوار كبار. وطبعا ديما موش نحكي مع المتحوشدين... و الشعبويين... والفاشيين.... و المساندين للإنقلاب....ولي كانو في جحورهم او يتمعشو من الإستبداد وقت بن علي... الخ…
هاذوكم إلي مزبلة التاريخ سائرون ....