قالولو في خارطات طريقهم يلزمها حوار...قاللهم لوجو عليه في كتب الجغرافيا...وما نعملش حوار.. شدو صحيح في الحوار...وكثر عليه الضغط في الداخل ومن الخارج.. قال هاذي خيانة وطنية واستعمار... هددوه من الخارج بش يقصو عليه العلفة لتمويل الميزانية وخلاص الأجور والترفيع من ميزانية القصر... رضخ للخارج ومش للتوانسة إلي بعثهم لكتب الجغرافيا…
وقاللهم باهي تو نعمل حوار... وحتى تصحيح المسار هاو بش يولي "ديمقراطي" موش ثوري والسيادة ديما في العلالي. لكنو اردف وقال.. الحوار بش يكون موش كيف قبل... بدون المحاورين متاع العادة منذ الثورة.
وطبعا بتعلة المغالطة العادية متاع ما يجيش حوار مع الخونة ومع الفاسدين وكأنو ما ثماش قضاء مختص وحدو في الموضوع وديما بدون ذكر شكونهم الفاسدين رغم المطالبات وهو يتعلل فقط موش ما يعملش حوار... كيف حكاية الوزرة إلي رفض آداءهم لليمين..
وكي تجي تحل الصرة.. تلقاه موش حوار وطني... وإنما عملية لتنظيم تياره السياسي بأنصاره من الحشد... باستعمال جهاز الدولة وموارد واموال الدولة.. خلافا للقوانين الصارمة في الموضوع ... وزاد كلف يابوڨلب احد الوزراء يخلص من الدولة بتنظيمه.. وزادة بش يهبط فيه أمر رسمي!! الدولة عندو ملك السيد الوالد.
وهذا فساد سياسي... اتجرم بعد الثورة بعد القضاء على نظام دولة الحزب الحاكم... الممول من أموال الدولة... وفصل أجهزة الحزب الحاكم عن أجهزة الدولة ...ومصادرة الأملاك العمومية الي استولى عليها التجمع...
واليوم يلزم يتحل بحث في كل من يأخذ مليم من أموال الدولة... لبعث هذا التنظيم السياسي الإخشيدي .. فبحيث.. ما ثماش حوار...ثمة جريمة فساد سياسي بش تصير....
الثقفوت
يضحكوني برشة الثقفوت النظروت إلي أصبحو يقولو بعد إقصائهم من الحوار المخصص للحشد دون سواه .. "آنا مع 25 جويلية لكن.. " هو إعتراف صريح منهم... بانهم "منظرين" ما يقراوش وغير مطلعين على مشروع الإخشيدي الإنتخابي.. يا بوڨلب.
أو انهم في بالهم بيه.. وعملو الفارينة للبلاط أملا في جلب انتباه البلاط... ياخي طفاهم وطلعتلهم قرعة.
يا حسرة على البلاط متاع بكري.. هاذم جواعة سلطة وتمكين بمفاصل الدولة.. ياكلو الدنيا ويتصحرو بالآخرة.. وحدهم.
فبحيث.. ما انجمش نتشمت... لكن نقوللهم راكم ساهمتو في مغالطة المواطنين مرتين... و مواصلين يا بوڨلب. الأولى.. وقت قلتو هو موش انقلاب على الدستور.. خاطر تعرفو تقراو بالعربية...والدليل انكم تكتبو بيها.
والثانية...لأنكم مواصلين تغالطو في المواطنين... ومواصلين تقولو انكم مع هذا الإنقلاب... تحت غطاء تصحيح المسار... وانتم تعرفو انو المسار الوحيد هو حكم فردي مطلق... خصوصا بعد الأمر نومرو 117.
وبحيث... ربي يكون في عونكم... بما انو البلاط سكرها في وجوهكم.