ياسر يضحكوني بعض "القانونجيين"... إلي يعملو في السياسة بالخرمولوجيا الدستورية. منذ الإنقلاب على الدستور... وانا نقرا في برشة نوادر باش تدون في بيت الحكمة التونسية... وباش تتسجل في تاريخ الإنسانية زادة من برشة اسامي متاع مبدعين توانسة من سياسيين.. وحتى من "أساتذة" قانون دستوريَ.. يا بوڨلب... يا بوقلب .
هذا كاتب... "راشد الغنوشي يريد الزج بالبلاد في حرب أهلية"... وكأنو مجلس النواب "المجمد"... (وهي سابقة تاريخية في تاريخ البرلمانات كيف البني القاعدي في تاربخ الدساتير)...هو راشد الغنوشي وحدو المجلس... ويقرر وحدو في عوض مكتب المجلس.. وخصوصا عوضا عن الجلسة العامة للمجلس إلي هي لكل في لكل.. وهي سيدة نفسها …
وعندو ال 216 نايب الباقيين مجرد ديكور... وكأنو المجلس موش سلطة أصلية تتخذ فيه القرارات بالأغلبية في الجلسة العامة.... وهذا زادة يقولها نايب.. تلقاه السيد يحكي على روحو.
ولاخر كاتب "صراع الشرعيات"... في عوض يجي ملخر... ويقول الإنقلاب على الدستور شرعي. ولاخر كاتب...الأمر نومرو 117... هو الشرعية اليوم... تلقاه متعود ياخذ صفر في دراستو في التربية المدنية...خاطر حكاية كيف هاذي ما تتقراش في القانون الدستوري في السنة أولى حقوق.
ولاخر كاتب "انقلاب على الإنقلاب"..خاطر عندو التمسك بالدستور انقلاب... وقت حتى المنقلب على الدستور وقت يعمل مراسيم الأمر الواقع متاعو... يندعي في مطلع المرسوم انو يطبق في الدستور.
ولاخر كاتب اجتماع المجلس المجمد إنقلاب على الدستور…على أساس أنو الدستور قال انو المنقلب عندو الحق دستوريا يجمد المجلس… ياسر تضحكني هاذي. الحاصيلو… أحنا التوانسة نهبلو العالم في مفاهيم الشرعية… و الدساتير…..والإنقلابات… وتجميد البرلمانات.
ويلزمنا نعملو أكاديمية دولية للقانون الدستوري…نقريو فيها النخبة العالمية. وطبعا ديما نقعدو نقولو ونعاودو… يسقط الانقلاب ويسقط_الحكم_الفردي.