قلتو مقاومة الفساد؟ يبطى شوية..
وقت الفخفاخ أقال شوقي الطبيب... قلنا ردو بالكم من السقوط في التجاذبات...راهي المسألة مبدئية وخطيرة.. رئيس الحكومة ما عندوش الحق يقيل رئيس هيئة مستقلة... خاطر وقتها تولي موش مستقلة... علاوة على أن الإقالة تخرق روح الدستور... ومشكوك حتى في قانونيتها...وأن مقاومة الفساد ما تكون كان بمؤسسات مستقلة وقوية موش كان بالدوسيات... وراهي سابقة خطيرة ضد مكسب من مكتسبات الثورة...
وقتها فطاحل "التنظير" بدون بوصلة...تنظير خلفيتو التجاذبات والعلاقات والأمزجة والمصالح موش ما نقولوش حاجة أخرى..."نظرو" ان رئيس الحكومة عندو الحق خاطر اسمو الفخفاخ وشوقي جايهم على عينهم العورة... والجماعة الي شوقي جايهم على العين السليمة نظرو بالعكس... وكأن المسألة تتعلق بشخص الفخفاخ أو شوقي موش باستقلالية هيئة مستقلة عن الحكومة وعن كل السلط…
وغيرهم بخلفية لا ترد فاس على هراوة... ما تحركتلوش شعرة للدفاع على استقلالية الهيئة وهو في كل دورة يتزايد بشعار َمناهضة الفساد...ههههههه ههههههه فبحيث هاي النتيجة...كل رئيس حكومة يجيبلكم رئيس الهيئة متاعو في مكتوبو ...وطاح الكف على ضلو.. ويحيا الفساد... عفوا مقاومة الفساد..ههههههه ههههههه
شفتو قداش محلاهم جماعة تحقيق استحقاقات الثورة؟حتى المكاسب القليلة باعثينها؟
بعد الحديث عن المبادئ.. المتعلقة باستقلالية الهيئة الواجب احترامها من كل مؤسسات الدولة... وهي مكسب من مكاسب الثورة وقع دوسه مرتين في اقل من سنة... نجيو توا للتجاذبات السياسية... و ازدواجية المعايير... وخلينا انبرو شوية على خونا الإخشيدي المعظم... إلى عامل فيها يحترم في الدستور والقانون…
عاد خونا الإخشيدي الموقر... استقبل مبارح رئيس الهيئة المقال من المش.. وعمل خطاب وقال للشعب الذي يريد.... برشة حوايج....ومنها أنو إقالة رئيس الهيئة من طرف المش غير قانونية…
هو كي تجي تشوف المرة هاذي عندو الحق...وانا موافقو...
خاطر الإقالة غير قانونية... خاطر في قانون الهيئة ثمة فصل يقول أن رئيس الحكومة يعين... وثمة فصل يقول أن مدة تحمل المسؤولية ستة سنوات... وما ثماش فصل يقول أنو من حقو يقيل...وهذا مقصود لضمان استقلالية الهيئة وعدم التخلص من أعضاءها...وقت تجبد ملفات وتحقق فيها... وتكون تتعلق بأعضاء الحكومة او شوشواتهم...
وزادة معروف انو إذا كان القانون ما يعطيكش صلاحية إدارية... ووقت تمارسها تتسمى تجاوزت السلطة...وهو غير قانوني..وممكن حتى تآخذ عليه شخصيا أمام القانون الجزائي...
عاد خونا الإخشيدي الموقر الي يعرف كل هذا...راهو كان استاذ قانون عام ويقري فيه للطلبة طيلة مدة طويلة... عمل فيها ما في بالوش وقت أقال الفخفاخ شوقي الطبيب من رئاسة هيئة مقاومة الفساد وعوضو بالمقال حاليا من المش.. وقتها الإخشيدي سارع بدعوتو لآداء اليمين قدامو...بش يتسلم مهامو... وعفس على القانون... وقت برشة ناس تحتج وتقول راهي الإقالة غير قانونية…
وهذا نقول فيه موش خاطر شوقي...كان عميد المحامين ويعرف يدافع على روحو وحدو ... لكن احتراما لاستقلالية الهيئة ودولة القانون والمؤسسات الديمقراطية…
واليوم.. هاو وقت تغيرت المصلحة السياسية... رجع للإخشيدي شاهد العقل القانوني... وصرح علنا ان الإقالة غير قانونية... على كل... أحنا نتوسمو الخير...مانش من نوع ڨاتلك ڨاتلك..
نقولو انشالله العقل ديما يكون موجود عند الإخشيدي...السيد راهو رئيس الدولة... ومؤمن على تطبيق الدستور أعلى القوانين... وانشالله تكون بداية جدية.. وكيف ما يتقال بالعكري.... Mieux vaut tard que jamais
كليمة أخيرة... للبني ويويست الإخشيديين الي قاعد نقرالهم وكسروهلي…
علاش عاملين القفة للإخشيدي العظيم... على هذا الموقف الجديد؟... راجعو وش قلتو وقت إقالة شوقي الطبيب...خصوصا وقت قلتو انو رئيس الحكومة عندو الحق يقيل.. الحاصيلو ربي يجبرلكم...عملتو كيف الماريكان في ازدواجية المعايير... هوما في حقوق الإنسان... وانتوما في تطبيق القانون... تتصرفو كرعية... والفارينة من فوق…
قداشكم فسفس زادة انتم...كيف الفسفس لخرين..