بعض الوخيان النقابيين "المحمولين" على اليسار الي قاعدين توة يتصداو لاستهداف السلطة للاتحاد ، وخصوصا وقت يبداو يتناقشو مع مع خصومهم حاليا الي هوما زادة كيفهم يساريين اما ضد القيادة الحالية ، تلقى عندهم في نقاشهم ثلاثة حاجات مشتركة رغم اختلافهم :
اولا : الحديث على " الاتحاد " بالألف واللام في كل العصور على انه حاجة واحدة ( ماهية ثابتة يعني كيما واحد كي يتحدث عن الفلسفة بالالف واللام قال هيدجير يرحمو ) في حين نعرفو الي الاتحاد ظاهرة تاريخية متحولة في تموقعاتها السياسية عبر العصور مثل الفلسفات المتعددة .
ثانيا : اعتبار الاتحاد متاعهم هوما فقط ، juste مختلفين على المفتاح عند شكون يبات وشكون هزو من غير ما يقسم الباي .
ثالثا : ثمة حكاية يعاودو فيها ان الاتحاد ديما النظام ضده وكل السلط اضطهدته ( الي هو مش صحيح والقواعد اختلفت مع مركزيات عديدة على ولائها لبورقيبة وبن علي لكن لا علينا ) وزيد متأكدين ومتفقين في نقاشهم ان اكبر عملية اضطهاد شهدها الاتحاد في تاريخو كان في العشرية الماضية ( متاع الخوانجية طبعا ) .ويلزم ديما يزايدو على بعضهم( وهوما يتناقشو على الوضع الراهن يعني ميتهم ممدود مش عزاء محمود ) ..يلزم يزايدو في ثنايا النقاش شكون يسب النهضة اكثر من صاحبو باعتبارها اقوى حزب حاكم شهده تاريخ الدولة التونسية وكان حزب " يشخط أوي " عالاتحاد ...مش أوي أوي يعني ...بس كان " يشخط "..
لهذه الأسباب وين يجي الواحد يحب يقول كليمة للدفاع على " الخيمة " ويشوف حديث هالقيادات ..يولي يقول ...زايد واكهو ...خلي التاريخ يمشي الى أقصاه ...زايد يا عمي ....