هم غاضبون على الثورة و مصيرها و انا لا ...بالعكس انا ندافع عالوضع و نحبو يبقى رغم الي انا كيف الاصدقاء الغاضبين هاذم مانيش رابح ...انا من بين العديد من الاصدقاء الذين كنا نشتغل في الشأن العام ( السياسة يعني ) قبل الثورة و أنا مثل كثير من هؤلاء ممن خرجنا من اللعبة بعد الثورة ..
لا ربحنا في انتخابات و لا تحصلنا على مناصب ..الحقيقة انا مع هؤلاء الاصدقاء الغاضبين لما يقولون الي اغلب من استفاد من الثورة اليوم هم من كانوا نكرات قبل الثورة سواء من المنظومة القديمة او الجديدة ...لكن هذا مش مبرر باش ننقمو على الوضع و نطالب باسقاط منظومة الديمقراطية …
الله غالب كانوا هم اذكى منا و استفادوا جيدا من الثورة ...النهضاويون خاطر عندهم جمهور و المنظومة القديمة خاطر عندهم ماكينة و حتى الي طلعو من غير هؤلاء او اولئك فهم من نجح في صناعة ماكينة ...هاهو جماعة التيار و الشعب و ائتلاف الكرامة مثلا ...عملو ماكينات و ربحو في الانتخابات رغم انو فيهم ناس ما كانوش قبل اربعطاش يعملو في السياسة و فيهم برشة الي كانوا نكرات اما عرفوا وين يمشيو و دبرو رئاسة قايمة مع هؤلاء …
يعني احنا الي ما استفدناش و ما دبرناش بلايص بعد الثورة مش معناها الثورة خايبة و انما معناها احنا ما عرفناش نخدمو …يا اخي مش معناها كنا نعملو في السياسة قبل الثورة …" نناضلو " يعني كما يقول العديد منا ..فمعنى ذلك يلزم الشعب ينتخبنا و الا يلزم يدخلونا معاهم في الحكم …اذا ما تخدمش على روحك بتقنيات ذكاء ما بعد الثورة ما تلقاش روحك …
انا لا اغضب من الثورة و اعمل على اسقاطها لأنها طلعت النكرات و الي ما عملوش سياسة قبل الثورة …هكا يولي حسد و بغض …تحب تدبر بايك بعد الثورة …كون ذكي و ابني حزبك و الا جمعيتك …الماضي متاعك مش شهادة للمرور ..