بالله امالا مادام جبدتو الموضوع ..نحب نقوللكم راهو حليب الغبرة يجري الكرش ....ايا سيدي هاهو بالدليل ...أنا في المدرسة الابتدائية في السبعينات ما كنتش مقيد في الكنتينة وحليب الصباح...تي على أساس طبقة وسطى ...لا طبقة وسطى لا شيء ..هي طبقة في اعلى هرم الطبقة الشعبية على اساس الوالد بشهريتو في شركة شبه عمومية ...تي الحاصيلو ...عاد بحيثو ما كنتش نمشي نشرب حليب الصباح الي يبدا يصب فيه سي الشاوش ...سي احمد وقتها بظهرلي ...في هاذوكم الكيران الالمنيوم الي بالوذن …
عاد الحاصل يا سيدي مرة من المرات قالولنا زملاءنا في القسم متاع الطبقات الشعبية :يا لولاد ( يقصدونا احنا متاع الطبقة الوسطى ) تي اعملو طلة نهار اشربو معانا كويرات حليب الصباح راهو سي احمد الشاوش ما يفيقش بكم ...اكهو عاد احنا مانا جماعة الطبقة الوسطى عندنا حب الاطلاع والتخنتيب ...ما كناش من العاكسين وهبطنا بكري و بدينا كار حليب يمشي وكار حليب يجي ...حتى سي احمد الشاوش الحقيقة فاق بينا اما طفى الضوء ...ماهو هو زادة طبقة وسطى ...امالا صاحب شهرية من عند الحاكم ...وسطى امالا لا …
المهم ما نطولش عليكم انا كملت الكار الثاني والشيء بدا يتحرك ...اكهو عاد رجعت نجري للدار ...ومن حسن الحظ احنا ماهو قبل ديما المكتب يبدا قريب من الحومة بحيث كان يكفي اني نسرع شوية في الخطوة باش نوصل في الوقت المناسب لدارنا ...وهذا من ايجابيات التعايش بين الطبقات الوسطى والشعبية في حاراتنا القديمة ....
العبرة من القصة : حليب الغبرة راهو يجري الكرش ويلزم بعد ان تم اقرار توريده اتخاذ اجراءات مرافقة ...هذا ما عندي افدتكم بيه وهي على كل حال وجهة نظر قابلة للنقاش .