الانغلاق اللاديمقراطي الذي يصعب الشفاء منه لأنه مخلوط بداء التأدلج السطحي والوظيفي هو أن تتصور ان مساندتك لشخص من اجل حقه في الحرية او حتى من اجل حقه في المحاكمة العادلة يعني انك تتبنى افكاره ...اكثر من هذا ان تتصور انه عندما يساندك شخص تختلف عنه في قضيتك العادلة فهذا يورطك فتتبرأ من تلك المساندة ...مرة بعد الانقلاب ساندنا شبيبة ضربهم البوليس عملو بيان يرفضو في المساندة متاعنا وقالوا تساندو فينا باش تدافعو على ديمقراطية النهضة في حين نحن كنا نعترض بمساندتنا لهم على ممارسات البوليس تلك حتى لو مورست على مجرم ..
يعملوها الشبيبة عادي ام الغريب كي تبدا منظمة المفروض متاع التوانسة الكل .. الاخ نورالدين الطبوبي عندو اكثر من شهرين يستقبل في الاحزاب والجمعيات وفيهم الي عمرو لا يعرف نقابة ولا يساند اتحاد ... تجمع على دساترة على يسار على قوميين و رافض يستقبل جماعة جبهة الخلاص قال شنوة معاهم النهضة وائتلاف الكرامة رغم الي الجبهة فيها نقابيين و ديمقراطيين افنوا اعمارهم في الدفاع على الحق النقابي …
خلينا عاد من مواطنون ضد الانقلاب هاذوكم اصلا ما نحكوش عليهم لأن الي يقربهم يتاذى داخليا وخارجيا ... خونا سامي الطاهري و غيره من النقابيين وين يذكرو تسلط الانقلاب وحشوده على الاتحاد يلزم يذكرو بتسلط حشود العشرية السوداء وهجمة حماية الثورة على ساحة محمد علي رغم ان كثيرا من انصار الترويكا او الشرعية وقتها ندد بذلك كما ندد ايضا بصعود اعداء الاتحاد من ليبيراليين "متوحشين" الى منصة محمد علي يدا في يد مع النقابيين "الاشتراكيين" الملتقين وقتها في مقاومة " الرجعية متاع الاخوان ( اليوم الحق سامي في تصريحو ذكر ميليشيات الصياح اكهو اكيد نسي هجمة حماية الثورة )…
المتوقع اصلا ان الاتحاد ينجم يلغي اليوم اضرابه العام مش لان مطالبه تحققت اما فقط باش ما يستفيدوش من هذا الاضراب خصوم الانقلاب ...اكثر من هكا يعاودو ويكعررو الاضراب مش سياسي وما نحبو حتى توظيف الأحزاب ( يقصدو جماعة ضد الانقلاب ) ...علاش مش سياسي ؟ مش قلتو الاتحاد منظمة وطنية وتهمو البلاد ؟ مصير البلاد باهي توة تحت حكم فردي يعصف بالديمقراطية ؟ والا الديمقراطية متاع الاخوان بلاش بيها خير حتى كان الي في بلاصتها يعور للاتحاد عين المهم يعور للخوانجية زوز ؟
لماذا اقول كل هذا الكلام ...لا لشيء الا لنؤكد ان الانقسام السياسي هو خير ما يخدم سيستام الاستبداد والفساد الي عشرة سنين وهو يلعب على هذه التناقضات ومازال باش يلعب ويحكم وان طريق الحرية والديمقراطية في العالم العربي مازال طويييييل حتى ينتهي هذا التصحر الايديولوجي الوظيفي الذي يسيطر على نخب ستبقى علاقتها بالديمقراطية علاقة تخارج وتناقض …