مشاو للرقاب وجماعة مشاو لجنيف .مش كيما قالولك مشاو من الرقاب لجنيف .وراهو جماعة جبهة الخلاص ما طردوهمش من الرقاب، بل ثمة مواطنين في القهاوي التحقوا بالمظاهرة متاعهم وثمة زوز والا ثلاثة من جماعتك هم الي طردوهم الناس خاطر كانوا شوية برشة وما نجموش يعملو ديقاج .
سيدي الرئيس هاذوكم الي تعاركو في البرلمان وسال الدم بيناتهم راهم مازالو لتوة مش متحالفين مع بعضهم .راهم جماعة الدستوري الحر وحدهم وجماعة التيار الديمقراطي في الخماسي وجماعة الائتلاف في جبهة الخلاص .وراهم لتوة مختلفين على حكاية النهضة و العشرية وكذا .
راهو غازي الشواشي استدعاه المجتمع المدني الي هو على نفس المسافة مع الي يعارضو فيك الكل والشواشي كي مشى لجنيف مش معناها متحالف مع الي مشاو غادي ...وراهي مش حكاية ولاء للخارج راهو في التقاليد الدولية ديما تاقع انشطة على هامش اجتماعات مجلس حقوق الانسان وراهو جماعتك مش ناشطين وكانوا ينجمو يمشيو يدافعو على مشروعك التاريخي ..
سيدي الرئيس راهو جماعتك لاهيين يتعاركو مع بعضهم و ما يتفرجوش في الفيديوهات متاع المعارضة وما يتبعوش في مواقفهم بدقة وراهو اغلبهم فارغين ويعملو برشة اخطاء في الرسم والنحو والصرف وما يعرفوش يقرو وما يعرفوش يكتبو...جماعتك ضعاف سيدي الرئيس ...ديجا ما لقينا مع شكون نعملو عركة باهية وعميقة وفيها مضامين ...راهم حتى الفضائيات كي يجيبولنا الراي الاخر الي يمثلك ما نلقو ما نجاوبوهم على خاطر كلامهم فارغ ويحشم …
ربي يقدرنا على فعل الخير باش تبدا العركة السياسية منظمة وما تدخلش المعلومات بعضها ونلقاو ناس عليها القيمة تمثل 25 العظيم …