الان فلنوضح : انا اجزم لمن يريد ان يفهم بلاده فعلا من اعلاميين و سياسيين و حتى سلطة ان وقفة يوم السبت كانت فعلا وقفة مواطنية بالمعنى الحقيقي للكلمة ....
ثمة شبيبة بعثولنا الدعوة الى الوقفة و قالولنا اذا موافقين انشروها على حساباتكم باش احنا نكملو نخدمولها و اذا مش موافقين نبطلو ما نروجوهاش ...كان الامر فعلا مبعثا للفخر بهذه الثقة ..و مبعثا للخوف بماذا نجيب ..هذه مسؤولية .. ...عملنا ملاحظات توجيهية علنية في تدوينات للجميع ..ووافقنا و نشرنا كأي مواطن يساند في عمل مواطني .
حضرنا في الوقفة و اكتشفنا ان البلاد اصبح عندها مواطنوها الي لاهم قطيع و لا رعايا ...فيهم متحزبين و مستقلين و مهتمين بالشأن العام ...اما زادة ما يتحملوش مسؤولية اغلاط احزابهم و لا تياراتهم و لا تغفيص النخب و كي يلزم الدفاع على المشترك الديمقراطي اصبحوا ينجمو يقدرو و يهبطو ...يتنادون ...التنادي هذا اعظم عمل ديمقراطي مواطني …
الشباب الي على دروج المسرح نادونا باش نتدخلو ...قلنا لا ....هذا جهد مواطني ...و لا احد يتحدث باسم جهد المواطنين الا حناجرنا جميعا برفع الشعارات و قبضاتنا المرفوعة دفاعا عن حرية و ديمقراطية و مواطنة يريد انقلاب ان يجهز عليها باسم الاجهاز على منظومة 24 جويلية الي الله لا يردها ...اما 25 ما يقتللناش حلمنا و دستورنا و ثورتنا و مواطنتنا و مسارنا وهو يزعم انه بصدد قتل 24 .
مواطنون بالحق ضد الانقلاب .. مواطنون يعني لا جابهم حد و لا يقودهم حد ...الي بحب يفهم بلادو يفهمها و الي يحب يواصل حالة الانكار و تزييف الحقائق الله لا تردو ....
كان حضور لافت و عظيم بلاش ماكينة و بعد ما برشة امتثلوا لبعض وجهات نظرنا بتجنب التحشيد و الاكتفاء بحضور رمزي ...و برشة سمعوا اقتراحنا بسرعة المغادرة و لو طولت الوقفة كان العدد يتضاعف مرات و مرات لان برشة بداو يخلطو بعد ساعة وقت بدأت المغادرة ..
انا كمواطن متابع و اريد ان افعل في الشأن العام حضرت و تبعت و فهمت الدروس باش نعرف بلادي و شعبي ...الي يحب يبني على الكذب باش يطمن روحو من نوع : وققة ضعيفة ...و الا ...ايه برشة اما النهضة هي دعاتلها ...و الا هاوكا مظاهرة اخرى مقابلتها او غيرها من الحماقات ...وقتها ما فهم شيء . خليه في الوهم الانكاري .
كلمة اخيرة ...ما ثماش تنظيم اسمو مواطنون ضد الانقلاب ...و ما ثمة حتى حد ينطق باسم الناس الي وقفت امس الا الناس نفسها . .الباقي يكذبو عليكم حتى لو كان نبدا انا .....
اقرا التدوينة بالحرف ...قلت فيها برشة حاجات …