أنا مانيش اختصاص قانون لكن يظهرلي حتى في قانون الإرهاب ..الابن والا الأب والا الأم يسامحهم القانون في عدم التبليغ عن بعضهم حتى كان ثمة جريمة ....فما بالك بدفاع أو غضب ابن من اجل أبيه السجين ظلما…
شوفي يا سلطتنا الموقرة ...أحنا السياسيين أولادنا يترباو عادة في أجواء سياسية وحتى كان ما يطلعوش نسخة مطابقة للأصل مع أفكارنا وخياراتنا إلا انهم يحبونا ويفتخرو بينا ووقت نتظلمو يستثمرو كل إمكاناتهم للدفاع علينا …
بنات الغنوشي ...بنت عبد الحميد ...بنت السيد وولدو ...ولد سيد احمد صواب ...بنت زياد ...ولد شيماء ..أولاد عصام ...وغيرهم وغيرهم ....خلي من الخو والأخت والزوجة والأب ...ياخي تتصورو السياسيين مقطوعين من شجرة ؟ والا أفكارهم وخياراتهم فردية ؟ ...راهي خيارات رباو عليها عايلاتهم وتحملوا مع بعضهم مسؤولية ضريبتها في سنوات الجمر الي فاتت وسنوات الجمر الي جاتنا توة على غير رادة ...ولهذا من غير المتوقع أن العايلة تسكت والا تتبرأ وقت يتظلم واحد منها من اجل مواقفو السياسية .
ايه هات نخليوها معركة فرسان ...واجهوا الخصم المباشر وخرجو العايلات مالعركة ...الياس غضب من اجل أبيه ...ينجم يقول كل شيء وعلى كل حال حكى سياسة ..مش فروسية توسيع العركة للعايلات ...يولي استعادة خايبة برشة لذكريات نوفمبرية سيئة جدا ...موش باهي …