البيروقراطية الباهية الي ترضينا الناس الكل ...الخيمةعلى هامش حوار الامين العام اليوم و غير اليوم … …
نور الدين الطبوبي ..اولا لأنه ولد المدرسة العاشورية الي هي نقابية نقابية و ثانيا لانو مش نقابي سياسي كيفنا و ثالثا لانو مش " متثقف " " جعبة " كيفنا ..كيفنا يعني انا و سامي و سمير و لسعد وووو الاف من النقابيين الي يحبو يعملو الثورة و يغيرو العالم و يرقعو طبقة الاوزون بالنقابات الي نحبوها تولي مثل احزابنا ..
لانو هكذا يقعد هو و كل من شد المنصب الاول في الاتحاد على مر التاريخ …يقعد يعمل التوازن …التسويات …يحفظ تعدد الاولاد و افكارهم تحت الخيمة….يقيس الدوزة …و يضبط الايقاع بين الدولة و المجتمع و النظام و الاختلافات السياسية …بين الثورة و الاصلاح و القديم و الجديد و الراسمال و البروليتاريا و الفلاحين و الطلبة و الملايكة و الشواطن …
العقلية " النقابية " التفاوضية الي تشد العصا من الوسط من وقت الحركة الوطنية حتى الاستقلال و ما تلاه من صراع اجتماعي و سياسي …الاتحاد ما كانش و مش باش يكون منظمة ثورية و لا حزب عمالي و لا خط سياسي …هو عمود من اعمدة " البناء التونسي " متاعنا الكل …قوة تعديل بمعنى ماهوش قوة عند حتى حد …وقت يدخل في صراع مع الدولة و نظامها تدخل البلاد في ازمة و وقت يدخل في وضعية تدجين و خضوع للدولة و نظامها تحتقن البلاد ..
هاذاكا هو الاتحاد …خطاب الامين العام هذا و غيرو قبل و توة و غدوة .. ما ينجم حتى طرف يسيطر عليه و ذكرى مؤتمر طبرقة و تموقع الفين و ثناش قوس يتسكر لانو مش هاكا الاتحاد …الاتحاد هو الكيمياء التونسية …ما تعبر عليه كان مدرسة عاشور سليلة حشاد …البيروقراطية الباهية هاذيكا يقعد على يسارها كان يحب سمير و سامي… اما زادة على يمينها و بحذاها و قدامها و وراها يلزم ثمة الوان تونس الكل …غير هذا تخلويض ما يتحملوش الاتحاد و مش مجعول باش يتحملو و كان تحملو في قوس من الاقواس ما يطولش برشة في تحملو ….سامعني خابيبي …سلام