قداش من نائب فاسد طلعو في الاخير ؟ النواب المحالون عالمحكمة العسكرية هل احيلوا بسبب ملفات فساد ام لانهم ضد قيس سعيد و ضد المضادة ؟ شكون الكتلة او الكتل البرلمانية الي رذلو البرلمان و عملو العرك و عطلو الخدمة باش الناس كرهو البرلمان ؟
و وقت يبدا برلمان فيه فاسدين و الا ناس تعمل العرك و الا طلعو بالفلوس الفاسدة هل انو نحاكموهم و ندخلوهم للحبس و الا ننقلبو على البرلمان و نحطو في بابه دبابة ؟ شكون المسؤول بالضبط على عشرة سنين خراب كما يقول كثير من كلاب الحراسة ؟ شكون : الثورة ؟ ..الديمقراطية ؟ الحرية ؟ ..الاحزاب الي عارضت بن علي ؟ …و الا الفساد و السيستام و المنظومة ؟ …شكون قال الناس تحب دبابة قدام البرلمان ؟
قداش من واحد خرجو نهار 25 جويلية ؟ و كيفاش خرجو ؟ و شكونهم ؟ و باي حق يتحدد مصير البلاد بمن خرج يومها ؟ يعني شكون منهم عندو حق باش يقوللنا الي على خاطر هو خرج نهار 25 يلزم قيس سعيد ينقلب بالأمن و العسكر على الديمقراطية ؟
في كلمة يعني : هل لان اربعة كذابة في الاعلام و اربعة سياسيين يحبو الانقلابات و يحبو القوة الصلبة للدولة توقف المسار الديمقراطي مهما كانت رداءته ..هل لانهم يتكلمو اكثر من غيرهم في الاعلام و علاقتهم مع القوة الصلبة للدولة خير منا الكل …هل لهذه الاسباب من حقهم باش يحكيو فقط هوما الحكاية بسرديتهم و كتابتهم و يقررو مصير البلاد ؟ هل من حقهم يعملو الي يحبو فقط لان الدولة المخطوفة عندها ستين سنة هي الدولة متاعهم ؟ …
ايه على خاطر النهضة هي الخاسرة من الانقلاب و على خاطر سيف و امثاله هوما فقط الي تحطو في الحبس و على خاطر انتم جاية معاكم الدولة و قوتها و اعلامها و قضاءها و بوليسيتها يلزم نقبلو بالحكاية متاعكم ؟
…لا …نقولولكم تكذبو …يا كذابة …و اكهو …و اربحوا صحة ليكم ….اما نقولولكم يا كذابة …..علاش نقولولكم يا كذابة ؟ باش التاريخ يسجل انو مش على خاطركم انتم كذابة متحدون بوليسية و ادوات دولة و اعلام و الخ احنا باش نخافو منكم …لاااا …نقولو كذابة و نقعدو نستنو توة تطيحو …