هاذاكا علاش راهو مصرين احنا ان 25 فيها ان …

اسمعني ايجا نقلك ..اجراءات 25 و ما يقوم به الرئيس حاليا لا يصل الى درجة من العمق تخلي البعض يطرحو علينا اشكالية :ننجمو نأجلو الديمقراطية و الحريات حتى نقاومو دولة المافيا و الفساد ...لأنو الي قاعد يقوم بيه سيادة الرئيس ما ارتقاش الى درجة مقاومة دولة المافيا و الفساد ...وين تشوف فيها المقاومة ....و حتى كان مبرمج يطلقها المقاومة هذي ما ثماش داعي نأجلو الديمقراطية و الحريات لانو ما ثماش داعي اصلا للمقايضة هذي ...بالعكس مقاومة دولة المافيا و الفساد تكون شبابة و مزيانة و قوية في اجواء ديمقراطية و حريات و دستور و قوانين و تعبئة وطنية ....

تقلي الديمقراطية جابت الفاسدين ؟ ايه معاك ...و نمشي معاك اكثر ...فشلوا فيها اغلب المصلحين ...خاطر فلوس و اعلام محتكر و غيرها ..اش خلانا احنا السياسيين الزواولة بعدنا عالعمل الحزبي ...اما زادة جابت صالحين ...ياخي الرئيس و حركة الشعب و التيار مثلا ماهي جابتهم الديمقراطية هذي بيدها و الا لا ؟ ...ايه و احنا كي يبدا ثمة فساد نقاومو الفساد و الا الديمقراطية ؟ ..و ديجا ثمة قوانين كنا نستعملوها في البرلمان و في البلاد باش نواجهو اعلام الفساد و خلط المال الفاسد بالسياسة و التشويش في البرلمان و تمويلات الاحزاب المشبوهة …

ما فهمتش كيفاش صارت المقايضة هذي فيسع : ديمقراطية و الا مقاومة فساد ؟ اش تحبو ؟ لا و فرحان بها انت ؟ و خليت النقاش الكل تحت سقف هالسؤال المغلوط هذا و ناس تبرر و تناقش ...انا بصراحة الثنائية هذي اصلا نعتبرها منداف …

ثم بربي ثمة جماعة حطو ارواحهم طول في ضفة مقاومة الفساد ...على اساس هم جماعة مقاومة الفساد و الاخرين جماعة الديمقراطية الشكلانية ..

ننجمو نثبتو معاكم في الصفة هذي الي عطيتوها لارواحكم ؟ تي اصلا انتم نكرات صعيب تنجحو في الديمقراطية لو كان مش شوية و الا برشة فساد ...مثال من الشوية مثلا انو اعلام فاسد عطاكم برشة فرص قبل الحملة الانتخابية باش يصنعكم كقوى وظيفية في مواجهة ناس اخرين هم الديمقراطيون الحقيقيون و وليتو نجوم سياسيين و نجحتو في الانتخابات ...ايه هذا مثلا فساد ...تي بحيث...الامور معقدة …

و لهذا ننجمو راهو نقاومو الريع و المافيا و السيستام و الجن الازرق و الفساد السياسي و الاخوان و الارهاب و الرجعية و العمالة و الزطلة و اتساع ثقب الاوزون من غير ما نحبسو الديمقراطية و الدستور ...بل بالعكس ....هاذاكا علاش راهو مصرين احنا ان 25 فيها ان ...و هي ان متاع تحالف الشعبوية و الفاشية و الوظيفية و السياقات الدولية ...bon بعد بعثهم الفاشية و الوظيفية هاذيكا زادة امور اخرى …

اسمعني ...ايجا نقلك ...اموركم تاعبة ...ما تنجموش تلعبونا في النقاش ...اما صحة ليكم ...عندكم الماكينات. …

Poster commentaire - أضف تعليقا

أي تعليق مسيء خارجا عن حدود الأخلاق ولا علاقة له بالمقال سيتم حذفه
Tout commentaire injurieux et sans rapport avec l'article sera supprimé.

Commentaires - تعليقات
Pas de commentaires - لا توجد تعليقات