باهي اخطاونا مالأخلاق والعقل والأفكار الكبيرة وجوجمة المحاججة واقنعني ونقنعك..! بالحق بالحق فكّ علينا من هذا الكل! أحنا التوانسة ناس على قدّ حالنا وما نحبّوش برشا تكسير راس بصراحة. أصلا اللي يحكي معانا ببرشا جدية ويبدا مركّز وجايب ما عندو.. طول نسخطوه بالعبارة الوطنية الشهيرة "بربّي يزي مالتفلسيف!".
وبناءً عليه.. واصلوا هتك أعراض الناس ربي معاكم! وردّوا بالكم تستنّوا أحكام القضاء! خاطر أكيد إسرائيل متورطة وباش تمنع كشف الشبكة متاعها اللي كانت مكلفة بتشويه الانتقال والتهجم على رموز الحزب القائد للثورة! واللي الانقلاب الوطني نجح في كشفها وتفكيكها في إطار المواجهة متاعو مع الصهيونية والامبريالية! وما تكسّروش روسكم برشا مع جماعة الأخلاق الحميدة اللي يحبّوا يقنعوكم اللي قذف الناس بالباطل حرام ويهز لجهنم.. ابعثوهم يشيّطوا وقولولهم علاش ما تكلمتوش قبل وقت فمة ناس أخرى تم انتهاك حياتها الخاصة! عاد معروف في دين والدينا الكل أنو البادئ أظلم!
بربي واصلوا الرخ لا!
آما حاجة وحدة نحبكم تتفكروها: لازمكم مع كل كلمة تهبطوها على "الفضيحة العظمى" تشكروا الصحفيين العظام اللي تمكنوا بفضل عملهم الصحفي الاستقصائي الرائع من إطلاع الرأي العام على تفاصيل الفضيحة.
ردّوا الفضل لأهله.. واشكروا الناشط الوطني المتطوع نبيل الرابحي والصحفي الشجاع رياض جراد والصحفي الهُمام سمير الوافي والصحفي المنتدب لكفاءته باسل ترجمان!
اشكروا مراجعكم الصحفية والفكرية والأخلاقية يا ديني!
ويعنبو العقل منين عرّق وورّق!
تبا…