كبير المحامين متاع تونس، حاتم المزيو، أو بودربالة2، أدلى بحوار لموقع توميديا أول أمس. حاصيلو حاجة تعمل الكيف فعلا.
سي بودربالة2 قاللنا اللي عمادة المحامين ساندت 25 جويلية خاطر الشعب الكل ساندها. عجب سي حاتم؟ الشعب الكل ؟ متأكد ؟.. باهي كي نقلك انا، العبد لله، وأمي اللي عمرها تسعين عام.. ما خرجناش نساندوا في 25 لطيفة. والله كيما نقلك يا حاتم. زعمة صايي معادش باش تحسبنا مالشعب التونسي؟ والا تحب تقول اللي ما زمروش نهار 25 خونة وعملاء وأعداء الشعب؟ خسارتك يا حاتم.. الساعة ما يظهرش عليك شرير لهالدرجة!
وبالله قلي سي حاتم.. محسوب أنت خرجت تزمّر نهار 25؟ بصراحة مستحيل تكون خرجت! مالا يزي أمانك مالمزايدة الفارغة.. أنت تعرف أنو أغلب اللي خرجوا يزمروا ذرّ تتراڤص ما فاهمين شي والا منحرفين متاع أحياء شعبية قابضين فلوس.. والكلهم بتأطير "سياسي" شبه مكشوف.
معناها سيّب عليك مالديماغوجيا متاع "الشعب الكل". قياس رأي الشعب عندو أدوات مجمعة عليها المجتمعات الحديثة. الأدوات هذي اسمها انتخابات. عدا ذلك يسمى شعبوية وانقلاب وقلة حياء.
سي حاتم بودربالة معجب زادة بالخطاب السيادي لسعيّد. ويبدو انو مقتنع اللي القرار السياسي التونسي حاليا قرار مستقل تماما. امااااانك سي حاتم! ياخي ما سمعتش ابراهيم عرفك آش قال وقت رفض تمرير قانون تجريم التطبيع ؟ موش قال اللي سعيّد قالّو اللي القانون باش يضرّ بالأمن الخارجي متاع بلادنا ؟ يعني بالفلاّقي راهو أمريكا وفرانسا وبنوك العالم والكيان يتغشسوا علينا؟
بصراحة سي حاتم خيبت ظني فيك. ما توقعتش انو كبير المحامين يكون كعبة لا لهالدرجة…
سامحني.. تبا.