قاللهم عام 2019 فمة مظاهرات رفعت شعار "الشعب يريد الفسفاط من جديد".. ولازمكم ترجّعوا الفسفاط خاطر الشعب يريد.
قالولو نحبّوا نخدموا في شركة الفسفاط متاعنا. قاللهم هاوكا فمة مقاسم أرض فارغة شفتها وانا جايكم توا في الطريق.. امشوا اعملوا شركات أهلية فيها.
قالولو هذيكا ماهيش أرض الدولة.. راهي أراضي اشتراكية يعني عندها أصحابها. قاللهم انا دوري نمهدلكم الطريق باش توصلوا للبرلمان وتشاركوا في وضع التشريعات والتصورات ورفع التحديات.
قالولو راهي أعمارنا ضاعت ونحبوا نخدموا. قاللهم لازمنا نحاسبوا الفاسدين وامشيو اعملوا شركات أهلية.
قالولو نحبوا نخدموا في شركة الفسفاط. قاللهم الدولة فالسة ومحتاجة فلوس الفسفاط وراهم قاعدين يذلّوا فينا على قرض بأربعة فرنك.
قالولو رانا نشوفوا في المليارات تخرج مالشركة قدامنا واحنا بطالة ومرضى ومقهورين ونحبوا نخدموا...
ثم.. اللي يسجّل في الفيديو بطّل ما كملش نقل الحوار المباشر بين الشُّعب والرئيس متاعو.
تي موش تبا برك.