بعد هذا الاحتفال النوفمبري البهيج، المطلوب من الأخت ليلى حداد والأخ لسعد اليعقوبي، على سبيل الذكر والحصر، وباعتبارهم من رموز حملة "نعم" لدستور البنْي القاعدي وناشطي صبّان الدالّة متاع الفكر الجديد، أنهم يعملولنا حالا ندوة صحفية يقدمولنا فيها أعضاء لجنة تنظيم هذا الاحتفال التاريخي…
بدءا باللي أشرفوا على عرابن الطبالة والزكارة، مرورا بكاتب الشعارات السياسية الرشيقة اللي رفعتها الجماهير.. من نوع "المجد لروسيا العظمى" و" أهلا سيد الرئيس".. وصولا إلى صاحب فكرة الكواترو الضخم متاع سعيّد، وخاصة خاصة شوفير الكميون اللي عمل دورة شرفية نوفمبرية تفلق بالكواترو الجليل حول منڤالة بن علي، خاطرو بصراحة ظاهر صنايعي مقطّر.
والأهم من هذا الكل.. ماذا بيا ليلى ولسعد يوضحولنا العلاقة القومية العميقة والخفية بين كواترو عبد الناصر وكواترو سعيّد، والعلاقة الوجودية الصميمة بين الزكرة وعيد الاستقلال وحركة الشعب.
وفرد مرة يفسرولنا علاش ما هبطوش يشطحوا مع جماهير الشعب العظيم على أنغام الفكر "الزُّكرَفوني" الجديد.
ملحق خاص: الأخ هيكل المكي الذي قال يوما "أحب سعيّد حبا جما".. وتغيّب عن حفلة الزكرة اليوم.. نحب قلو الحب موش كلام.. الحب شطيح ورديح.