المسلسل من إخراج ابراهيم بودربالة.. وفكرة هيكل المكي.. وسيناريو خليل الرقيق ومراجعة لغوية للأخت ليلى حداد

البارح تفرّجت في زنس مسلسل يقتل أصل.. في أول الحلقة قصّ الماء.. والبطل اللي الحقيقة مانيش متأكد منو تونسي والا أطلنتيسي، قعد يستنى قدام السبالة نهار وليلة باش يدخل للتواليت حاشاكم ويدوّش.. وفي لخّر شرا دبوزة ب900 مليم اكاهو وأجّل الدوش لين يزيد يتوسّخ شوية في ما دام رجع ماء الحاكم. وكان تشوفوا قداش حس بالسعادة من غير ماء.

وبعدما تفرهد سي البطل خرج عمل دورة في المرشي يلقى زنس رخص في البلاد.. بالعمل شوية لا داخ مالفرحة.. يضربلها كيلو لحم علوش ب41.000د اكاهو.. وكيلو بانان ب8 دينارات اكاهو.. حتى كي الخضار قالو هاو بانان خمسلاف جاي غدوة قالو هات برك محسوب.. شماتة في العشرية...

عاد وهو راجع للدار يدلوح في صاشيات اللحم والبانان ويدندن في غناية "حماة الحمى" يطيح كف وغرزة هو والزعيم هابط لحومتو في زيارة فجئية يتفقد في البنية القاعدية متاعو.. يعمل هكة ويطيش اللي في ايديه ويبدا يصيح بقلب ورب "قيس يا معذبهم.. احنا معاك سيدي الرئيس.. نحيلهم والديهم سيدي الرئيس".

المسلسل من إخراج ابراهيم بودربالة.. وفكرة هيكل المكي.. وسيناريو خليل الرقيق ومراجعة لغوية للأخت ليلى حداد.

حاصيلو مصلّي عالنبي على وزارة التربية ونقابة اليعقوبي متاع الثانوي. صدقوني خايف عليهم مالعين. الله وحد الله وحد على الانسجام العاطفي الحميمي اللي هبط عليهم فجأة.

شوف سيدي أي.. حلّوا مشكلة حجب الأعداد وتلامذة بلاش معدلات وسنة دراسية ماشية نحو المجهول ومأساة أساتذة نوّاب يعيشوا وضع العبودية ووضع مادي مزرٍ يخص كل الأساتذة.. ومؤسسات تربوية ما عندهاش أوراق لطباعة الامتحانات.. ومشاكل الإصلاح التربوي الكل…

وتعدوا ديراكت يحتجوا مع بعضهم وبصوت واحد وبنفس المفردات المتكلسة الرديئة على مسلسل تلفزي.

الوزارة والنقابة الزوز في بالهم بالمسلسل في كل مراحله. والتظاهر بالغضب الشديد على مسلسل وتصوير الأمر على أنه مأساة تفوق في خطورتها الملفات التي تنخر المدرسة وبالتالي كل شبابنا وعائلاتنا ومجتمعنا.. هو تبهليل ودزان بيدق وشعبوية بائسة.

تبا.

Poster commentaire - أضف تعليقا

أي تعليق مسيء خارجا عن حدود الأخلاق ولا علاقة له بالمقال سيتم حذفه
Tout commentaire injurieux et sans rapport avec l'article sera supprimé.

Commentaires - تعليقات
Pas de commentaires - لا توجد تعليقات