اليوم في جوهرة اف ام قال اللي 25 جويلية له أعداء من خارجه وفي داخله أيضا.. وعلى رأس أعداء الداخل توفيق شرف الدين وزير داخلية سعيّد وصديقه ومدير حملته الانتخابية في سوسة.
هيكل يتهم شرف الدين بأنه "مشيشي جديد" ويشغّل ميليشيات فايسبوكية مهمتها تشويه أنصار الرئيس.. وذكر موقعي سيب صالح وصدربعل.
بل أنه حذّر الوزير من استهداف شخصه أو حزبه حركة الشعب وحمله مسؤولية ذلك.. مهددا بأن القضاء سيكشف قريبا معطيات خطيرة حول صلة وزير الداخلية بهذه المواقع.
التعليق :
توا بربي يا هيكل بعد كل التضحيات العظيمة اللي عملتها في حبّ الرئيس.. وبعد ما حببتنا فيه وحكيتلنا اللي هو قليل النوم ويكتفي من الطعام بتمرة واحدة نهار كامل.. ومع ذلك يهزّ صحّتو.. وصدقناك.. وحبيناك حتى أنت والله شاهد على قلوبنا.. بعد هذا الكلّ تكيكس وتشكك في تعيينات الرئيس؟
بصراحة ما يخرجش عليك.. آش كان عليه كان وزير سيدك وزعيمك غلط معاك غلطة صغيرة.. والا حتى كبيرة؟
ما تعرفش ياخي المثل التونسي العظيم "اللي شدّ الصبع شدّ اليد"..؟
وأنت شديت يد الانقلاب الكل.. باش يكيدك صبع وزير متفان في خدمة الصعود الشاهق في التاريخ ؟ في عوض تتحمل وتسكت وتشهق مع وخيّانك اللي مقطّعين أرواحهم في التنسيقيات باش نخلطوا لكوكب السعادة…
حقّا موش أنت اللي أنت اللي قلت كوكب سعيّد جميل ونريد أن نعيش فيه جميعا… ؟!! مالا تعرف كيفاش هيكول.. كول واسكت ويزّي مالتشوكيع الفارغ يهديك.