بزهري اليوم.. وعالصباح يعطيك الخالق.. طحت بعمك ابراهيم متاع المحامين في إذاعة.. عاد تسأل فيه الصحفية على موقفو من برنامج سعيّد ومحاكمات النواب وغيرو من تفاهات الوضع الجديد…
يوخّر عمك برهوم ويقدّم ويقوللها أحنا اليوم محكومين بحاجتين.. الحاجة الأولى سلطة وشرعية الأمر الواقع.. معناها بلغة أخرى بحكم "المتغلّب".. بلغة أوضح بحكم "ذراعك يا علاّف"…
اسمع عاد الحاجة الثانية.. برهوم قالك وببساطة الشعب مع سعيّد.
بكل ثقة وهدوء سي ابراهيم يقول ويعاود اللي مساندة الشعب لسعيّد مسألة واضحة.. الشعب الكل يا بوقلب.. ما قالش حتى الأغلبية.. معناها أنا مثلا نمشي نشوف شعب على روحي غير الشعب متاع برهوم...
باهي شوف برهوم.. توة لا محالة رمضان والكلام البذيل موش باهي.. أما هذا لا يمنع باش نقلك راك فضيحة ومسخرة وعار على المحاماة التونسية حاضرا وماضيا ومستقبلا وبعد المستقبل..
ومانيش باش نسألك على المقاييس اللي اعتمدتها باش تأكدت مالتأييد الشعبي للانقلاب.. لا لا.. خاطر كان نسألك نولي بوهالي كيفك.
هو لا محالة أنت ماكش بوهالي.. الكذب العاري متاعك ما ينجم يتفسّر كان بحاجتين :
• إما عندك دوسي رزين يخليك تخذل الحقيقة، والعقل، والذوق، والمحاماة.
• وإلا أنت منخرط في تنظيم سياسي مجهول هو الذي خطط ونفذ الانقلاب.
كان جيت كيفك في الحالتين نعلن السبب ونتحمل مسؤوليتي.. خير ما نعمل العار لقطاع كل تاريخه دفاع عن الحقوق والحريات ودولة القانون.
هنا عاد.. تبا ونص.