ما فهمتش شنية حكاية المناظرات بين الشيعة والسنة في تونس! شنوه معناها؟ اغلبية الشعب التونسي مهتم بالفرق بين الشيعة والسنّة وقعدتْ امورو معطّلة وحياتو واقفة ومتعطّش بش يعرف الفرق بيناتهم، مثلا؟ خرجت اعتصامات واضرابات اطّالب بش يعرفوا الناس مصيرهم؟ إيْ، واللي يشاكوا في المناظرة في حدّ ذاتهم، شنوه اهدافهم في الحياة، بش واحد يستميت على صحّة احاديث الشيعة ولاخر على صحّة احاديث السنة، اكاديمية بحتة، مثلا؟. وشنوة اختصاصهم بالضّبط؟
إيْ، والمنشّط في حدّ ذاتو، عندو الامكانيات متاع فريق كامل قرا ولخّص مجلدات القرطبي وابن تيمية والكافي اذا موش اطنان من المراجع التاريخية، وعندو المستوى بش يوقّف كل واحد حاد على النزاهة العلمية والصرامة الفكرية؟ شنوه البيعة المقطّعه هاذ!. علاش موش بين أباضي وبهائي؟ علاش موش سلفي وعلماني؟ علاش موش بين بومنيجل وشكري الواعر؟ والاّ بين سهام بالخوجة وانصار اللغبابي؟
باهي، لازم اعادة قراءة التاريخ على خاطر التاريخ يرويه المنتصرون! داكوردو، لكن هذا امر مفروغ منّو منذ ما يزيد عن عشرات السنين!
علاش ما تعملش مناظرة فكرية في السياسات الاقتصادية (السياسات الراهنة ضد البدائل المُمكنة)؟ في المسائل الاجتماعية الحالية؟ في اصلاح نظام التعليم؟ في الهوية والقيم الاخلاقية؟ في مجال سوق الشغل؟ في تاريخ الحركة الوطنية التونسية، مادام التاريخ يكتبه المنتصرون؟ في العلمانية الفرنكفونية ضد العلمانية الانغلوفونية؟ في استراتيجيات التنمية ("احادية غير متوازنة" أو "متوازنة متعددة القطاعات")؟ في مفهوم السيادة الوطنية في ظل فرقعة العولمة الى اقطاب متعددة؟ في سيناريوهات مستقبل الاجيال المقبلة؟ ....
يقول العالم جاستون باشلار اللي "المُلاحِظُـ يغيّر بالضّرورة الشيء الذي يُلاحظه (يراه) (L’observation (..) est toujours une observation polémique ; (..) elle reconstruit le réel après avoir reconstruit ses schémas’’)، يعني وقتلي تجيب واحد ديما يحكي على المدفونة، اللي ما يهتمّش بيها أغلب الناس، تولّي المدفونة وخصالها حاجة مُهمّة في سُلّم الاهتمامات، معناها تاخذ بلاسطها على حساب حاجات اخرين أهمّ منها....
وزيد حكاية السنة والشيعة اللي طلعت بعد حرب الخليج بصفة مدعومة، ما هياش صافية ولا تلقائية وماهياش من محض الصُّدفة، وميش بش تتحلّ في قناة يوتيوب شخصية تستدعي الهُوّاة، تزيد في المداخيل متاع صاحبها وتضيّع الناس وخاصّة الشباب على حاضرهم ومُستقبلهم.