سمعت اليوم في راديو اكسبراس-اف-امـ حديثْ على التضخم متاع شهر جويليا، ولازم نعرفو اللي لحكاية راهي تحليل متاع رقم: "تضخم =5.3%". آكاهو.
باهي.
بعض العناصر لا بدّ منها:
(1) قدّاش كانت وقدّاش ولاّت،
(2) الرقم الجديد هيكلي والاّ موسمي، عابر..(وهذا ممكن بش نعرفوه)،
و(3) على أساسُو تنطلق في التفسير (التشخيص) موش في التوصيف.
معناها، تكون عندك معرفة مُسبقة على كلّ أسباب تحول مؤشر الأسعار، وموش لازم تعرضهم الكل، على خاطر المجال موش متاع استعراض الأدبيات، لكن تكون محضّر روحك بش تحكي على الأسباب في الواقع التونسي الخاص وفي الفترة الخاصّة اللي جا فيها "الرقم" هذاكا، ويكون كلامك بالأرقام موش بالانطباع المخلّط مع "الرأي" – برّ لوّج عليه-. معناها لازم تكون تعرف اللي مثلا العنصر متاع الطلب الداخلي أكبر من العنصر التابع لشحّ العرض (والاّ العكس)، والاّ التضخم المستورد أكثر والاّ أقل من العنصر متاع تركيبة الأسواق (تنافسية، احتكارية…) والايلاستيسيتي بين القطاع هذا أكبر والاّ أقل مالايلاستيسيتي متاع القطاع لآخر… والاّ التكلفة…
حاصيلو، المهمّ انو يكون كلامك بالأرقام اللي عمرك ماك بش تلقاها في التقارير متاع الاي-أن-أس، لازمك تعملهم وحدك على خاطر انت متخصّص، واللي ايسمعوا فيك فيهم اللي يستناوا في الإجابة من نوع هذا. وبعدْ تكمّل كلامك بالعرض متاع (4) توصيات عملية مالكلام اللي كنت تقول فيه، موش من كلام آخر ماكنتش تقول فيه.
لكن تربط التضخّم بدور الدولة الاجتماعي، معناها "المالية العامة"، بدعوى عندها ارتباط بالتضخّم من غير ما تورّي كيفاش، وقتها صعّبتها على الناس الكل. يا سيدي شكون قالّك اللي مفهوم الدولة متاعك واللي انت ما قلتش عليه، مختلف على مفهوم الدولة متاع الناس اللي تسمع فيك؟ …لانّو حتى التضخّم مربوط بالمناخ وبالحالة النفسية متاع الناشطين في الاقتصاد (كينز من خلال نسبة الفايدة!)، ووقتها يضيع في الطبيعة (الترجمة خايبة).
وايذا الذاكرة ما خانتنيش، أوليفيي بلونشار وما أدراك (اللي هو كلّ عام مرشح بش ياخو جائزة نوبل) تعْرفْ بمُصْطلح تقني يربط المالية العامة بالنمو وبالتضخم وبالتشغيل…، اللي هو (Fiscal Puzzle) معناها لُــغز المالية العامة وقتلّي الدين العام يفوت حدّ معيّن، والاّ حاجة اللي هو بجُودْ نفسُو ما لقالهاش تفسير…
أكاهو.
إن شاء الله ما فمّه كان الخير.