احنا قاعدين ماحلانا، لا فمّه رشوة ،ولا فساد مالي وإداري، ولا فقر ولا بطالة ولا اجرام، ولا معارف، وكنّا في خير ونعمة، ياخي جات ثورة مالسّماء، هكّاكا، أي نعم وحّدها، فسّدتْ كلّ شيء ونحّات المُـــنظرين الكْبار والعباقرة والجهابذة والشجعان والاحرار والمفكرين والكفاءات العالية الموجودة في الدولة وجاوْا في عُوضهم ناس لا يعرفوا لا يقراوْا ولا يكتبُوا وشطرهم من المركّب الجامعي كانوا معارضين، شدُّوا الحُكم وحّدهم هكّاكا، لا بانتخابات ولا بأحزاب ولا بديموقراطية،
ولقاوْا البلاد في خير ونعمة وكياسات مافيها حتى حُفرة، وسبيطارات بكلها بالسكانار والاي-آر-ام، والاستعجاليات متاعها فارغة، والجهات الكل متقدّمة وفيها مراكز ثقافية عالمية، ومُولات، وميادين رياضية متعددة الاختصاصات، ومراكز بحث متاع النانو تكنولوجيا، والناس الكل عندهم دفاتر ادخار وما لقاوش وين يصرفوا فلوسهم، والعلماء مالخارج شادّين الصَّف على الجامعات التونسية، والدّينار متاعنا مفقود في الاسواق العالمية على خاطرو مطلوب عالّلخر،
ولا فمّه لوبيات مالدّاخل ولا مالخارج تعطّل في تكوين الحكومات وتضغط على أخذ القرارات، ولا فمّه دولة عميقة تخدم في مصالحها وتتحكّم في الامور، ولا فمّه اختراقات مُخابراتية تأثر في دواليب الدولة وتعرقل فيها، ولا عنّا ديون قديمة خذيناها ولازم نخلصوها، ولا عنّا بيع وشرا متاع ذمم باش المؤسّسات الدستورية ما تتعملش باش يستغل الفراغ الدستوري اللي يحب الخير لتونس، ولا تهريب الثروات للخارج اللي الملفّات القضائية متاعها مشات لسويسرا وغيرها ومافيها حتى ورقة ناقصة.
عاد قُلتلكم، جاوْا الناس هاذوما هكّاكا، مالسّماء، هِلكُوا البلاد بالواحد بالواحد من حكومة الترويكا حتاش لحكومة المشيشي "بسابقية الاضمار والترصّد" والناس ما انتخبوهمش، ياخي ولاّت بطالة وفقر وهَمّ أزرق وخبراء ومناظلين وقيادات، حتى اللّي عمرو ما اعطى رايُو في الطقس وما ينجمّش حتى يتحكّم في التليكوموند في دارُو ولّى يتكلّم على النظام السياسي وفي الديموقراطية وفي التاريخ متاع الاغالبة والزازية الهلالية وفي السُّنة والشيعة والنسبية متاع انشتاين وفي الوهابية والأكراد وفي موديز والترقيم السيادي والقائمة السوداء والغُرف المُغلقة وفي الهوية وفي الكوليب متاع بُشرى بالحاج حميدة والجوجل ماب باش يحسب بالضبط قداش من واحد خرج في المسيرة، وفي نسبة الفائدة المديرية وسعر الصّرف والكورونا والحماية من مخاطر الاحتباس الحراري... وكتلة الأجور وكاس العالم في روسيا وملفات باناما…
ويجيك لاخر يقدّم ويوخّر ويقولّك "الديموقراطية آش عملنا بيها"، و"كيلو الصُّحلب في وقت بن علي كان بدينار والحمص المنفّخ بمياة فرنك" وهذاك علاش يلزم انبدلوا نظام الحُكم باش الترقيم السيادي متاعنا يتحسّن.