قالّك جوهر بن مبارك (1) ماهوش رجل دولة على خاطر (2) "المجالس بالأمانات"، و (3) واجب التحفظ "، و(4) "التوقيت غير مناسب على خاطر البلاد تمر بفترة صعيبة"، وزيد (5) "ماعندوش اثباتات". طيب.
(1) رجل الدولة هو اللي الدولة والمصالح متاعها والوظائف متاعها مُقدسة، معناها عندها الاسبقية على كل الاعتبارات الشخصية والحزبية والطائفية. والمقدس بالمعنى الايثيمولوجي للكلمة، معناها "الذي يجمّع" مثل المبادئ الكونية، والاخلاق، والمشترك الوطني، اللي اذا كان يتمسّ، نولويوا ماعادش نحكيوْا على حتى شيء.
ورجل الدولة هو اللي يصمد امام العواصف الهامشية ويبعد مالعركات الفارغة وتطيح القدر ولا ينحني الا للمؤسسات متاع الدولة والقواعد اللي تسيّرها واللي خلاّتو يوصل مسيّر واللاّ مسؤول فيها. رجل الدولة هو اللي يستقيل اذا كان فاقوا بيه عمل غلطة تمس من هيبة الدولة واللا باع الماتش للأجانب واللا لجهات اخرى واذا كان عرف المصداقية متاعو واللات مشكوك فيها، على خاطر السياسات متاعو ماعادش باش يتبعها حتى حد وباش تفشل حتى اذا كان جاب معاه انشتاين وزير للصناعة، ولافر وزير المالية، وكروغمان وزير التجارة وريني ديمون وزير الفلاحة وحط بخذاه كاينز مستشار.
رجل الدولة هو اللي يكون قادر باش يحميها قبل ما يحمي روحو، على خاطرها البو (الاب) على معنى روسّو واللا حتى متاع جون بيتج متاع "الدولة صديقة للسوق"، والضامن للنظام الاجتماعي على معنى "بيرغسن"، و"القوة المركّزة للمجتمع" و"تمثيليته الرسمية" على معنى ماركس.
انا، في السيرك اللي عيشتو تونس توه، نحب نعرف شكون رجل دولة وشكون موش رجل دولة.
(2) المجالس بالأمانات، ايه، آش معناها، يبلعها بدمّها ويخرجوا الناس الكل ابطال ويمشي في بالهم التفوريخ وتعطيل مصالح الناس ومخاطر الانهيار الاقتصادي والاجتماعي وسقوط الدولة نتيجة متاع النظام السياسي ومتاع الثورة "الملعونة" وكلو من جرة الاحزاب؟ ويطلعوا نكرات تنظّر على العباد ويدخلوهم في متاهات؟
(3) واجب التحفظ. بالله على شنوة؟ على امن البلاد زمن الحرب، واللا على القيم متاعو؟ واللا موجود في المواثيق انو وقتلّي تشوف الاطراف بعاد ياسر على الحد الادنى متاع المسؤولية يلزم تولي شريك معاهم؟
(4) التوقيت. باهي، انو يعملوا جدول اوقات متاع التصريحات، باش جوهر بن مبارك يجي دورو عام 2045 اذا كان ما زاد علينا كان الخير. حتى لو كانت عندو أجندا سياسية -وهذا ممكن-، لكن يلزم اثباتو، لكن زادا الأهمّ هو محتوى الاتهامات الي قال عليها، والباقي تفاصيل.
(5) ماعندوش اثباتات، هنا صحيح، البينة على من ادعى واليمين على من انكر، لكن بن مبارك عمل تحدي باش اللي فيه ذرة من "رجل الدولة" ينكر السيناريو اللي قال عليه واللي هو قريب ياسر مالواقع اللي عشناه واللي نعرفوه.