اولا: شوية امور ثابتة: بعد خروج المستعمر من كل البلاد العربية خلّ مشاكل : (1) حدود موش ثابتة بين الدول، (2) طبقة سياسية قابلة للتعامل معاه، ويدعمها في كل مناسبة بش توصل للحكم واللا تبقى فيه، (3) واصل التعامل الاقتصادي والثقافي وفي التعليم بعد الاستقلال، و(4) زرع ممثلين متاع مصالحو في البلاد عبر برشة عنواين: دعم ثقافي، هبات، مساعدة فنية للتنمية، يعني ما مشاش على روحو فرد مرّة.
ثانيا: بعد الاستقلال، تلهاوْا الحُكّام في امور التنمية، واعتبروا رواحهم اللي هوما فاتهم ركب الحضارة، واللي هوما بش يتلهاوْا بالتقدّم ويحاربوا الفقر والقمل والسخط كيما قالها بورقيبة بالضبط. لكن هالدول هاذي الكل مالمغرب للدزاير لتونس وليبيا ومصر مثلا، لتوّه وهوما يعالجوا في حكاية التنمية ولتوّه ما خلطناش على مستوى متاع اقل دولة اوروبية كيما البرتغال واليونان وقبرص. ما نحكيوْش على ايطاليا وبلجيكيا ولا حتى اقل دولة من اوروبا الشرقية.
ثالثًا: التقديرات الاستراتيجية اللي تعملت عندها خُمسطاش انعام في العديد من مجموعات التفكير والدراسات الجدية، تقول اللي المُستعمر هذا (الفرنساوي والانجليزي) ومعاه امريكا وكاندا واستراليا راهو ماعادش مسيطر على العالم كيما قبل. وانو في وقت التكنولوجيات الحديثة اللي واللاّت مُتاحة، الصين والهند والبرازيل ومصر والسعودية والارجنتين وجنوب افريقيا وغيرهم، راهم بش يطلعوا ويمكن يولّيوْا حاجة كبيرة.
رابعًا: الدول هاذي يمكن تهز معاها برشة دول اخرين محسوبين على فرانسا وانجلترا وامريكا واللي عندهم ضغوطات داخلية مالشعب متاعهم.
خامسًا: شِ قوْلكم كان تقعد المنطقة هاذي الكل واللا جزء منها في "حالة عدم استقرار دائم" ويتضربو عصفورين بحجرة. اعطيوْني بلاد عربية وحدة قعدت الخمسين سنا اللي فاتت بلاش صدمات لمدّة عشرة سنين اكاهو! باهي، العصفور لوّل:
(1)ما يتقدموش ومايوليوش منتجين متاع تكنولوجيا،
(2) يقعدوا يتصارعوا بين بعضهم على حكايات فارغة متاع الفرق بين الهوية الامازيغية والعربية، والشريعة ميش مذكورة في القران، والخمر يحرم في القران واللا لا، والبخاري غالط، والفرق بين الشرعية والمشروعية، وتجي تشوف تلقى اللي نبش في الحكايات هاذي امّا ضعيف في الوطنية واللاّ بايع الماتش واللا هذاكا هوًتكوينو ما يفرّقش بين الحاجة المهمّة لذاتها، والحاجة المهمّه لما لها علاقة بغيرها! .
توّه عاجبكم اللي صاير في العراق وما ادراك؟ واللا في سوريا، بلاد ابو العلاء المعرّي، واللا في لبنان متاع ميخائيل نعيمة وليبيا متاع عمر المختار، والسودان متاع سوار الذهب، وتونس واليمن؟ ياخي ماهمش مناطق عبور متاع سفرات مكوكية متاع مسؤولين مالخارج؟
لعلّ السفارات المدجّجة الموجودة في البلدان هاذي لاهية تنظم في رحلات وتحب تذوق الملوخية متاعنا والكسكسي والعصيدة البيضا. العصفور الثاني المستهدف هو انّو الدول الصاعدة هاذي (الصين…) ما تلقاش امكانية متاع تثبيت القواعد الاقتصادية متاعها في المنطقة العربية وقتلّي تقعد هاذي في "حالة عدم استقراً دائم" يعني في حالة "عدم يقين دائم".
يعني اللي يجي يحكم يفسّخ ويعاود من جديد ومايفوتش عام في بلاصتو، واللي عندو فرنك متاع استثمار يخليه، واللي يقرا مايشوف حتى افق في المستقبل، واللي يقرّي هو بيدو عندو برشة مشاكل وعراقيل. وزيد، ما نعرفش كان لاحظتوها، اللي جاوْا حكموا من عام 2011، اكثر مالشطر متاعهم لا عندهم رصيد سياسي، ولا كفاءة معيّنة ولا يعرفوهم الناس ولا وسائل الاعلام… ياخي صدفة هاذي؟
والظاهر، اللي "حالة عدم الاستقرار الدائم" هاذي، ماهياش بش تاقف.